ZALEN August 31, 2026: P&E Minister F Rodingliana hoin vawiin khan a Office Chamber-ah RDSS Scheme hnuaia Smart Meter vuah mek chungchang hmalakna leh harsatnate Department official te nen sawiho na an nei.

He meeting-ah hian smart meter hman ngei ngei a ngaihchhante tarlan niin, India ramah electric kal ral (loss) tam tham tak tihhniamna turin, Ministry of Power chuan RDSS: Loss Reduction Scheme a duang chhuak a, he scheme hnuaiah hian Smart Meter vuah runpui chu ram pumah neih a ni.

Central Electricity Authority (CEA) (Installation and Operation of Meters) Regulation 2026 chuan communication network (internet signal) awmna tawh phawtah chuan Smart Meter hmang chauhin Electric supply pek tur a ni, a ti a. Amaherawhchu, pre-payment (prepaid) smart meter erawh electric hmangtute duh thlannaah dah a ni.

Meeting-ah hian Smart Meter vuah a pawimawhzia pawh sawiho niin, Mizoram-ah hian electric consumer 3,20,000 vel an awm a, chung zinga 34,300 vel chu meter chhia (reading kal lo) a ni a. Heng bakah hian meter engemawzat chu electric hman dan teh dik tawk loh a awm ngei tih hriat a ni. Hengte avang hian Mizoram chhungah electric kal ral (power loss) tam tak a awm phah a, he loss tihniam tur hian Central sawrkar hmalakna zarah smart meter vuah hna chu Mizoramah pawh thawh a ni, an ti.

Tun dinhmunah smart meter 82,000 vel vuah tawh a ni a, smart meter vuah tawhte zingah vuah thar tirh a bill tam deuh 24.67% vel an awm a. Nimahsela, a hnuah a tam chhunzawm chuanglo a an ti a; chutihrualin, bill tlem zawk pawh 30.24% lai an awm ve bawk a ni, an ti bawk.

Tarlan tak meter dik tawk lo te chu smart meter a thlak a nih hnu hian electric hman zat dik tak hriat theih a lo ni ta a, mi thenkhat bill a tam chhan pawh hi niin a lang. Billing period tihsual palh te, meter thlak laia manual reading lak sual palh te, sim card communication fel lo vanga bill a huna chhuak lo te leh thil dang tam tak avangin bill tam emaw, harsatna engemaw a awm theih thu tarlan a ni.

Hetiang harsatna tawkte puihna tur leh complaint thehluhna tur Customer Care Centre (CCC) te nasa zawka puanzar rel a ni a, electric bill chungchanga harsatna neite chuan landline telephone number 0389-2310169/2322174, Whatsapp No. 8132801559/6009192434 emaw, mahni bialtu Electric Department Office-ah harsatna te thlen theih reng a ni a, P&E Department chu mipui harsatna chingfel turin a inpeih reng thu tarlan a ni bawk.

Meeting-ah hian electric bill complaint a luhin, a dik leh dikloh finfiah hmasa lova bill pe hmasa tura lo nawrluitu electric duty an awm thin anga sawi a awm thu pawh sawichhuah niin, hetiang ang harsatna tawk an awm chuan Department hotute hnenah hriattir vat turin mipuite ngen a ni.

Mizoram-a hman tur smart meter reng reng hi phurhchhuah a nih hmain laboratory-ah a dik ngei a ni tih finfiah vek a ni a, he finfiahna (testing) ah hian Mizoram aiawhin P&E Department Engineer-te an tel ziah a ni an ti.

He meeting-ah hian Dr. H Lianzela, Secretary leh Er. Ngursailova Sailo, Engineer-in-Chief bakah Chief Engineer te, Superintending Engineer, Aizawl Power Circle bakah Aizawl Power Circle hnuaia Sub-Divisional Officer te leh Junior Engineer te an tel a ni.