Aizawl: Cabinet Minister hlui Col. Lalchungnunga Sailo chu nizan hmasa dar 12:15 khan chuap tha lo vangin New Life Hospital-ah a boral a, nimin chawhnu dar 1 khan Zarkawt thlanmualah vui a ni. Col.Lalchungnunga Sailo hi September ni 15,1938 khan Sertlangpui khua ah a piang a, kum 1962-ah sipai officer-ah lutin January 1994 khan Colonel-ah full pension-in a chhuak a ni. A pension hnu hian politics-ah zuanglutin MPC party a zawm a, kum 1998 MLA general election ah khan Aizawl West I atanga thlantlin niin Cabinet Minister a ni a, Social Welfare Department a enkawl a ni. Kum 2009 atangin lung tha lo a nei tih hriat chhuah a ni a, Apollo damdawi in, New Delhi-ah zai a ni a. A hnuah chuap natna chi khat ILD a nei tih hriat chhuah a ni lehin he natna hi a thihpui ta a ni. Col. Lalchungnunga Sailo hian a nupui leh fate 3 a kalsan a ni.