Aizawl: Nimin khan Thorang bialtu MLA leh Minister ni bawk Zodintluanga chuan a bial chhung West Bunghmun khaw chhung lei kak avanga chhungkaw 29 laiin an chenna an rauhsan chu a hmunah a tlawh. West Bunghmun Falkawn Veng lei khi kak hi June 12, 2018 zingah hriat chhuah tan a ni a, a tuk June 13, 2018 khan Bunghmun khaw Falkawn veng mawngah lei a min a ni tih hmuhchhuah a ni a, chuta tang chuan nimin thlengin a la che ta zel a ni. Lei khi kak hi a la chet zel avangin a mual hian a min mai ang tih a hlauhawm hle a, hei vang hian chenna in rauhsan tak in 27 te hi thiah thuai an duh thu khawtlang hruaitute chuan Minister Zodintluanga hi an lo hrilh. Minister chuan, “District Disaster Management Committee lamah thlen nghal a ni anga, in tam tak a liampui mai turte hi thiah a nih theih nan hma lak nghal a ni ang,” tiin a tuartuten an huan thlai leh an chenna in chhia avanga zangnadawmna an dawn theih tur ang document tihfel thuaia chenna in thiata chak la tha ang angte hman leh theih a nih nan chak taka hmalak a nih thu a sawi. Bunghmun khaw lei khi kak hi a khaw pum tana hlauhawm niin tun dinhmunah chuan a lang lo a, Govt. Middle School erawh an kawt takah a khik kak avangin School kal ngam a ni lo a, khawtlang hruaitute leh bialtu MLA te hian hmun dang luah tur an dap mek a ni. Chenna in rauhsante hi Hall leh chhungkhat laina hnaite bulah an khawsa mek a, Bunghmun khua hian harsatna dang lian tak an tawh chu ruah sur avanga kawng bal leh min nasa lutuk avanga inkalpawhna mumal lo a ni a, hei vang hian dawra thil zawrhte pawh pawisa neih avanga duh zat zat lei bik lo turin an inngen.