Aizawl: NEDP-Entrepreneurship Development Scheme (EDS) hnuaia mahni kutke a ding thei tura hmalaa intihsiakna ‘Micro Start-up Competition’ a titha thlanchhuah zinga mi Zo Agri Business Solutions, Edenthar Venga mi chu nimin khan I&PR Minister Lal Thanzara’n a hawng. Lal Thanzara chuan mahni kutkea ding thei tura hmala tute leh tang te chu sorkarin a ngaipawimawh a ni tiin, heng NEDP-EDS hnuaia bul tan tura ngaihtuahna senga hmala an awm chu lawmawm a tih thu a sawi a. “Mahni kutkawiha ngaihtuahna senga hmala a, engkima sorkar beisei loh kan zir a ngai a ni,” a ti a. “Pathianin Mizote chu ram nuam, sik leh sa tha, ruahtui tlak thatna hmun leh thlai chi tin rengin a ngeih ram min pe a, he kan ram thatna hmang tangkaia mahni intodelh tura hmala turin taimakna leh remhriatna kan mamawh a ni,” a ti bawk. Zo-Agri Business Solutions (Mizoram Sacha Inchi) hi Melvyn Vanlalhlimpuia ta a ni a. NEDP-EDS hnuaia MEDMOC in Micro Start-up competition an siam a titha thlanchhuah 15 zinga mi a ni a. Herbal thingpuife Sacha Inchi siamchhuahna khawl bunin hma an la mek a. Kuthnathawktu 70 chuang he thingpuife hi chin tirin, hralhchhuah theih tura hmalak mek a ni.