Aizawl August 4, 2024 : Environment, Forest & Climate Change Minister Lalthansanga chuan, "Forest department a thawkte'n dan hnuaia kan ram ramngawte an enkawlna kawngah kan ram hmasawnna ruhrel tithuanawptu ang hiala tunhma atanga mipuiin forest department an ngai thin hi a pawi hle a ni," a ti.

Forest Minister hian he thu hi Zirtawpni-a Synod Conference Centre-a M. Sawmliana lehkhabu ziah 'The Book of Mizoram Plants, (Includes Wild Animal, Birds, etc.)' 3rd Edition a tlangzarhnaah he thu hi sawiin kan ram ngei a awm thlai hrang hrang, nauban, sava leh ramsa, rannungte tarlanna lehkhabu The Book of Mizoram Plants tlangzarh theiha a awm chu lawmawm a tih thu a sawi a, thangthar lo la awm zel tur tan te, zirna sang leh zirbingna lama lehkhabu tangkai tak a nih ngei a beisei thu a sawi bawk. Minister chuan Forest enkawlna chu India danpui concurrent list-a awm a nih avangin dan hnuaiah khuahkhirhna tha tak nen humhalh a ni a, chuvang chuan EF&CC department chu namnul mai chi a ni lo tih a sawi bawk.

Thusawitu dang H. Lalengmawia, IAS, Commissioner & Secretary pawhin lehkhabu tlangzarh tak chu taimakna leh tuichilhna nena khawrpum ngei a nihzia a lang chiang hle a ni tiin a ziaktu tumruhna chu entawn theuh turin kalkhawmte a chah a. Khawvel civilization bul tanna Scientific enquiry pawimawhna chungchang sawiin kan ram hmasawnna kalzel a pawimawh em em dilchhutna nei theuh turin leh kan ecosystem siamthatna kawngah ngaihtuahna seng turin kalkhawmte chu a chah bawk a ni.

The Book of Mizoram Plants 3rd edition chhungah hian Plants - 1914 spp, Orchids - 343 spp, Wild Animals - 92 spp, Birds - 600 spp, Reptiles - 148 spp, Amphibians - 65 spp, Insects - 60 spp awmin thlalak lam Plants (Thlai) - 1710 nos, Orchids (Nauban) - 180 nos, Wild Animals (Ramsa) - 32 nos leh Birds (Sava) - 81 nos a awm a. Phek 563 a chhah niin Chapter 18-ah then a ni.