Aizawl: Nimin zing khan Information & Public Relations Minister Lal Thanzara chuan Hunthar Veng YMA Committee Room sak thar a hawng. Lal Thanzara chuan Hunthar Veng Branch YMA te’n sum tlem te hmanga Committee Room zahpuiawm lo tak an siam thei chu an fakawm hle a ni, a ti a. Mizoramah tlawmngai pawl tha tak tak, sawrkar atanga sum hmuh tum ringawt lo va, ram leh khawtlang hma sawnna ngai pawimawhtu an awm chu a vanneihthlak hle a ni, a ti bawk. Ram leh khawtlang hma sawn duh tak tak tan chuan party ruihchilh a hun tawh lo va; ram mipui leh mi retheite tana policy tha nei zawn thiam a tul zawk thu sawiin, I&PR Minister chuan thlan tlinte pawh vote zawng zawng ringawta hma la tur ni lovin, bial chhung thatna tura thawk tur an ni, a ti a. Bial chhung hma sawn nana theihtawp chhuah zel a tum thu a sawi bawk. Hunthar Veng YMA Committee Room sak nan hian Lal Thanzara chuan MLA Fund atangin Rs nuai 2 leh ama pawisa Rs nuai 1 a pe a ni. Hawnna inkhawm hi Branch YMA Vice President Malsawmkima’n kaihruaiin, President Rohmingthanga’n report a pe a. He hunah hian veng chhung MHIP, MUP leh Local Council hruaitute pawh an tel a ni.