Aizawl: AH & Vety Minister C.Ngunlianchunga chuan Zirtawpni khan Ramrikawnah Animal Feed Plant thar a hawng. Hawnna thu sawiin Minister chuan a hmaa khawl awmin ni khatah quintal 80 a her chhuah theih laiin Plant thar hi chuan darkar khatah quintal 80 ran chaw a her thei dawn tih a sawi a. “Ran chaw siamna atana thlai pawimawh tak pakhat chu vaimim a ni a, Mizorama vaimin tharchhuahte chu Animal Feed Plant-ah hian tangkai taka hman an ni dawn a, Animal Feed Plant hawn pah hian kuthnathawktute tan pawh an thlai thar chhuahte zawrhna tur kan hawng nghal bawk a ni,” a ti. Feed Plant hi NABARD-RIDF bultum a ni a. Mizorama tharchhuah vaimim leh thlai dang ran chaw siamna atana hman a nih theih nan ruahmanna siam niin heng atanga siam chhuah ran chaw hi man tlawm zawka ran vulhtute hnena zawrh leh tur a ni dawn a ni. He Feed Plant hian ran vulh hrang hrang an mamawh dan milin an chaw tur a her thei a, Plant hi chhum lo chat lova chhawr theih a ni bawk. SG Mechanical Works, Ludhiana chuan a sak hna an thawh bakah Animal Feed Plant-a bungrua leh khawlte hi an bun bawk a. Plant zawh fel nan hian cheng nuai 551.08 hman a ni. Feed Plant enkawl tur hian AH &Vety Department Director Chairman-na hnuaiah Management Commitee duan sa a ni a, tun dinhmunah Feed Plant-ah hian hnathawk 15 an awm mek a ni.