Aizawl: UD&PA Minister Zodintluanga chuan nimin khan Mizoram Civil Service Officer ten State Institute of Rural Development & Panchayati Raj (SIRDPR) Auditorium, Aizawla foundation training course an neih a khar. Minister Zodintluanga chuan MCS officer-te chu mipui tana awm leh mipui tana thawk an ni tih hre reng tur leh an awm chhan mipui tana rawngbawl tura theihtawp chhuah turin a fuih a. Officer tha chu a hnathawhah a lang thin tiin, an hnathawh that avanga hotute hriat hlawh, hotuten mawhphurhna an pek ngam leh an thur nalh nalh nih tum turin a chah a ni. Minister chuan internet kaltlanga information lakkhawm leh thawn chhuah zung zung theihna digital khawvela chuangkai tawh an nih avangin hriatna a pun rualin an hnathawhah fimkhur a tul lehzual tih hre turin a chah a. Political party tute pawh sawrkar se la, sawrkarna fawng vuantu apiang tana rinawm taka thawk mai tur an ni tih te, sawrkar hmalakna tipuitling tur an ni tih leh sawrkarin ti tura a tih tha taka hlen chhuah mai zel chu officer tha nihna leh ram hmasawnna bul pawimawh zinga mi a nih thu a sawi bawk. Training khar programme hi SIRDPR Director Maria CT Zuali’n a kaihruai a. Course Director Khuangthansanga Pakhuangte, Sr. Core Faculty (PA) chuan training an kalpui dan tlangpui a report a ni.