Aizawl February 28, 2023: ZPM chuan vawiin khan Mizoram Governor Dr. Hari Babu Kambhampati hnenah Minister of State Robert Romawia Royte in Section 9(A) Representation of the people Act 1951 a bawhchhiat avangin petition an thehlut. He petition-ah hian ZPM aiawhin SL Ngursailova Sailo, General Secretary, Vigilance Department-in hming a ziak a ni.  

SL Ngursailova Sailo chuan, “Pu Robert Romawia Royte hian The representation of people Act 1951 bawhchhiain diklo takin a thuneihna hmang hlawkna a tel avangin (office of profit) ZPM chuan Minister of State Pu Robert Romawia Royte hi Article 192 (1) to the Constitution of India thuneihna hmanga disqualify turin Governor hi kan ngen a ni,” a ti. 

ZPM chuan Robert Romawia Royte hi Northeast Consultancy Services (NECS) neitu niin vawiin thlengin chhiah pawh GST hnuaiah resturn a la file. He firm hian duhsakna hmangin Mizoram sawrkar-a 
DC&MA nen Deed of Agreement chu Single Source Selection hmangin an ziak a. NECS hi Proprietorship, mimal sumdawnna a nih angin a neitu leh hlawkna teltu chu MoS Robert Romawia hi a ni tih a chiang hle, an ti. 

An sawi zel naah ZPM chuan, "Assembly House chhungah a fapa ta anga a sawi pawh kha election affidavit-ah a fapa hi a hnena innghat (dependent) a ni tih a tarlang a. Hei bakah electoral roll thar berah pawh chhungkaw khat, inkhata cheng an ni tih a lang bawk. Mizo Customary Law hnuaiah a fapa hi índang a la nih loh avangin a fapa ta anga a sawi pawh hi a nihna takah chuan thuneitu leh enkawltu chu Minister of State hi a ni," an ti bawk.

ZPM chuan, "Heng zawng zawng en hian Minister of State hian a thutiam bawhchhiain a thuneihna hmangin sawrkar atangin hlawkna a tel ngei a ni tih a tarlang a. Hei vang hian ZPM party chuan India danpui hnuaiah Minister of State a nihna atanga ban turin Governor hi kan ngen ta a ni," an ti.