Aizawl: Finance Minister Lalsawta chuan nimin khan Armed Veng South MUP buatsaihin Upate Rûn a hawng a, hawnna hunah hian Armed Veng South huam chhung pawl hrang hrang MHIP, YMA leh Local Council hruaituten an hmanpui. Finance Minister Lalsawta chuan, “Mizoram sawrkar chu mi taima leh tih tak zeta hmasawn tuma thawk thinte puitu an ni a, Armed Veng South MUP ten Upate Run sak puitlin a nih theih nana thahnemngai tak leh tangrual taka an thawhho avanga tha taka sak zawh a ni,” a ti a. Upate Rûn hawn tak chu tangkai taka khawtlang mipuiten an hman theihna turin leh MUP ten zo taka an luahlum theihna turin duhsakna a hlan nghal bawk. Lalsawta chuan, “Mihring taima leh tumruh tan khawi ramah pawh awm se hlawtlinna a awm a. Ram leilung hausakna haichhuah chu a luahtute thawhrimna, taimakna leh tumruhnaah a in nghat thui hle a ni,” a ti a. Kal khawmte chu rilru ah hmasawn tum tlatna nen, mahni hna theuhah rinawmna leh tihtakzetna vawng tlat turin a chah bawk. Upate Rûn hawnna hun hi Saphmingthanga, Armed Veng South MUP President-in a kaihhruai a, Technical report te ngaihthlak niin Armed Veng South branch YMA, MHIP leh Local Council aiawhte hnen atangte in thusawi ngaihthlak a ni bawk. Upate Run hi MLA fund cheng nuai 5 senga sak a ni.