Aizawl September 9, 2024 : PC Party chuan Mizoram sawrkarin Minister leh Minister tlukpui mimal in cheina atana mipui sum cheng nuai 110 a hmang tawh nia lang hi uchuak taka mipuite sum khawh ralna ah an ngai a, pawi an ti.

PC Party chuan Mizoram sawrkar in hun rei tak sum harsatna a tawk tawh a. Sawrkar hnathawk hlawh pawh a hunah an pe kim thei lo reng a, kawngpui te pawhin a chhiat phah a, mipuiin a hun taka electric bill an pe chung pawhin sawrkarin electric bill cheng vaibelchhe tel an bat reng phah a. Hetiang sum harsatna lak atanga chhuah theihnan hian sawrkarin inrenchem a ngaih thu sawi rengin mipui pawhin sum renchem zawnga sawrkar hmalakna an thlawp a. Sum hmuh belh tura mipui phur tirit zawnga sawrkar hmalakna pawh mipuiin an dodal lo a ni, an ti.

PC Party chuan, "Hetiang anih lai hian RTI hmanga mipuiin kan lo hriat tak, Minister leh Minister tlukpui te In cheina atana mipui sum cheng nuai 110 lai hman a ni hi a zialo kan ti hle a ni," an ti.

"Kan minister leh minister tlukpui, leh VIP thenkhat te bungalow leh quarters-a chengin heng an chenna hi pawisa tam tak taka chei niin chung chuan sawisel a hlawh a. Hemi ni mai lova bungalow emaw quarters pawha cheng lo heng - Cabinet minister K. Sapdanga (cheng nuai 12), Vanlalhlana (cheng nuai 12), Lalthansanga (cheng nuai 12), Vanlalthlana (cheng nuai 12) leh PC Vanlalruata (cheng nuai 12) te; Minister of State F Rodingliana (cheng nuai 10), B. Lalchhanzova (cheng nuai 10), Prof. Lalnilawma (cheng nuai 10) leh Lalnghinglova Hmar (cheng nuai 10) te leh adviser to CM H. Ginzalala (cheng nuai 10) te In chei nana belhkhawma cheng nuai 110 lai hman a ni hi kan ram sum dinhmun atanga thlirin a awm ang lo kan ti hle a ni," an ti bawk.