Aizawl; Mizoram sawrkar chuan minister-te tan an chenna ina hman tur ‘residential internet connection’ a ruahmansak a, chumi atan chuan thla khatah Rs. 2,000 aia tam lo a bituk. He ruahmanna chungchangah hian office memorandum pawh chhuah tawh a ni.

Mizoram sawrkara principal secretary, GAD Navin Kumar Choudhary, IAS-in June 29, 2022-a office memorandum a tihchhuaha tar lan a nih danin March 7, 2022-a Mizoram Legislative Assembly hnuaia General Purpose Committee (GPC) thukhawm leh department of Information & Communication Technology (ICT) thurawn angin minister-te tan residential internet connection (mi mal ina internet connection) remtihsak an ni.

Ruahmanna siam a nih dan chuan internet connection atan Rs. 2,000 aia tam lo chawi-sak an ni dawn a, hei hian telephone/mobile phone a huam dawn lo a. Internet connection siam theih zat chu minister-te thu a ni dawn a, hetihlai hian internet connection chu engzat pawh hmang se, a vai a chawi ngai zat chu Rs. 2,000 a pel tur a ni lo, tih te office memorandum-ah chuan tarlan a ni.

Kum 2019 khan Mizoram sawrkarin under secretary chung lamte tan IT hmanrua a lo leisak tawh a, report hmuh theih chinah chumi atan chuan Rs. 20,55,795 sen a ni. Laptop leh thil dang leisak te chu hlawm thumah then niin, hlawm khatnaah secretary leh a chunglam dah niin, Rs. 80,000 man thleng an lei thei a. Hlawm hnihnaah joint secretary - addl. secretary dahin Rs. 60,000 man thleng an lei thei a. Hlawm thumnaah chuan deputy secretary - under secretary dah niin, Rs. 40,000 man thleng an lei thei.

Kum 2009, May 14 khan I&PR conference Hall-ah Mizoram Legislative Assembly hotute hmalaknain Administrative Training Institute (ATI), Mizoram chuan minister, speaker leh MLA-te tan computer zirna buatsaihin, hemi tum hian Mizoram sawrkar chuan minister, speaker te leh MLA te chu laptop a lo pe theuh tawh bawk.