Higher & Technical Education Minister Dr. R. Lalthangliana chuan hrilh lawk lovin Aizawl khawpui chhunga College 4 - Govt. J Thankima College, Govt. Aizawl North College, Govt. Hrangbana College leh Government Aizawl College te chu a tlawh a. Durtlang Leitan Venga Govt. Zirtiri Science College building sak mek leh a hmunhma siam rem ngai lai te a en bawk a ni.

Minister in sawi lawk loa College a tlawh thut chhan hi hriatthiam a har viau mai a, an mamawh leh awmdan dik tak hriat a duh vang a nih ngei a rinawm a, chin chhunzawm zel atan pawh a tha hle. Tun dinhmuna tihdan phung kan neihah hi chuan Minister a ni emaw hotu lian ten office, farm leh hmun pawimawhte an tlawh dawn chuan hriattir lawk hmasak an ni thin a. An tlawh tura thawktute pawh lo inringin a theih hram chuan staff te pawh awm kim an tum a, an hmunhma te pawh hmuh nuam zawkin an lo cheibawl thin a ni.

Sipai leh a bikin force lamah te hian intlawh thut thut (surprise check) ang chi hi an uar thin a, hei hi a chhan ber chu inring renga awm tur an nih avang te, an awmdan dik tak hriatchian an duh avang leh thu nunna kenkawhna atan a ni. Zep nak emaw office tam tak hi chu an hotute awm loh hi chuan an inthlahdah em em mai a, mipui tan pawha dawr hleihtheih loh leh dawr tur awm mang lo office te pawh hi an awm thin a ni. Sawrkar hnathawk tam tak hi chuan an rawngbawlna leh mipui tana thawk tur an nih hi an hai ta em ni tih awl rum rum khawpin anmahni mipui pawh hi an ngaihsak thin lo a, tlaiah lah nise sawrkarin ban hun a tih hmaa haw ta mai mai engemaw zat an awm bawk.

Tun tuma Higher & Technical Education Minister in College te a tlawh thutna chhan pawh hi an dinhmun dik tak hriat a duh avang leh siamthat ngai a awm chuan siamthat a duhna rilru avanga ti a nih ring ila, a kalna atang hian thil dik tak chu a hre dawn a ni. Chuvangin Minister thiltih hian rah tha a chhuah ngei beisei ila, Minister dang te leh Department hotu lian te hian chhunzawm zel thei se a duhawm hle mai.