ZALEN October 28, 2023 : Karnataka Energy Minister KJ Jorge chuan, "India ram hi a inthlak mek a, a inthlak chhan chu pawisa tihthih te, thil man to te, buaina chhuak te vang a ni. Manipur buaina te hi sawi fiah rual lohin a rapthlak a, Prime Minister hian tlawh pawh a la tlawh lo a, remna leh muanna a awm theih nan tha a la thawh lo a ni. Minority leh SC te pawh an him lo mek a, dinhmun hlauhawm takah an ding in an inngai a ni. Chu chu Mizoram pawh hian a takin kan hmu tan a ni," a ti.

Vawiina Aijal Club-a chanchinthar lakhawmtute a hmchhawn naah KJ Jorge chuan, "Mizoram thalaite hian eizawnna mumal te an mamawh a, dinhmun tha a din an duh ve a ni tih kan hria. MNF leh ZPM te hian Central sawrkar an thawhpui theih an neih a ngai a, chu chu BJP a ni. BJP chet dan kan hria a, anmahni hmachhawn thei tu awmchhun chu Congress party chauh an ni," a ti.

BJP dinhmun sawiin, "Mipuite hian BJP hi an thutiam avangin an ring a, rorelna an pe a. Kum kua an lo sawrkar hnu hian an thutiam te chu an tihlawhtling thei ta lova, hmasawnna a awm lova, thalaiten hna an hmu thei lova, an hna te an chan zawk a ni. Mipui nawlpui hian an tuar nasa em em mai a ni. Chung mite chhanchhuak tur chuan Rahul Gandhi chuan "India ram inpumkhatna kawngzawh" a kalpui ta anih kha," a ti.

Karnataka dinhmun sawiin, Mipuite chu inpumkhatna kawngzawh turin an rawn penchhuak ta a, chumi nghawng chuan Karnataka ah te Congress chuan sawrkar a lo siam thei ta a ni. Karnataka ah chuan Congress chuan a thutiamte a ti hlawhtling mek a ni. Energy Minister ka ni a, sawrkar chuan mipuite hnenah power unit 200 chin a ngaidam a, a bak an hman chuan chauhin an hman man an chawi a ni. Thalai hna hmulo Graduate 3000 hna a pe a, Diploma nei te 1500 a pe thin bawk a, Buh thar hlawk theih nan hma nasa takin a la a ni.

KJ Jorge chuan, "Congress in sawrkarna kan siam anih chuan harsatna kan hmachhawn ngei ang, mahse chung harsatna hmachhawn chung chuan hmasawnna hna nasa takin kan kalpui ang. Manmohan Singh sawrkar khan hmasawnna nasa takin a thlen a, Congress party Rahul Gandhi kaihruai pawi hi chutiang ang chu a ni dawn a ni. Chutiang chu Mizoramah pawh kan thlentir dawn a ni. Mizoram mipuite min thlawpna leh in vote hlu tak kan dil bawk che u a ni," a ti bawk.