Football khelh hun chhung hi minute 90 a ni a, hetiang chen chiaha rei hi Mizoram Football Association (MFA) pawhin kum 50 an tlin lawmna hun an hmang dawn a. All India Football Federation (AIFF) Secretary General Dr Shaji Prabhakaran-a’n a hmanpui ang.

Kum 1973-a din, MFA hian kuminah kum 50 a tling a, kum khat chhung lawmna an kalpui mekah a pui ber chu Ningani zan hian Vanapa Hall-ah AIFF secretary lian hovin an hmang dawn.

India ram football thuneitu berin a hmanpui turah hian MFA chuan Mizoram lo tihmingtha tawhtute a chawimawi dawn a. India tana senior level-a Mizo lo khel tawhte leh Mizoram atanga AIFF hnuaia kawng hrang hranga a hmasa berte hnenah chawimawina an pe dawn a ni.

MFA-in jubilee an lawmnaah hian office bearer leh executive committee-a member ni tawh te, kum 1973 leh 2023 inkara Mizoram aiawha khel tawh mipa leh hmeichhe player te, kum 50 chhunga sub junior, junior leh senior-a khelte chu kal turin an sawm.

MFA hi president hmasa ber chu Lal Thanhawla a ni a, a hnuah president panga - Rosangliana, K Liantlinga, PC Vanlalhruaia, J Lalhmingliana leh Lal Thanzara te awm tawhin an la dampui vek.