Anfield-a season thara Europe-a inlan phak tum pahnih, Liverpool leh Tottenham Hotspurs inkhelah goal sarih zet a lut a, minute 90 hnu lama Premier League table-a an insan chhawk zak zak hnuah hun tawp hma chiaha Diogo Jota goal hmangin Reds an dingchang ta.

Pathianni zan inkhelah hian mual neitu hian a tir minute 15 lek chhungin Tottenham lamah goal thum an thun hman a, heng goal-te hi an hum thei lo zui vek thung a, minute 94-a Portuguese forward goal thun an chakpui ta hram chauh a ni.

Kar hmasa khan Spurs hi Newcastle United-in 6-1 ngawta sawpin minute 20 lek chhungin goal nga an chhuah kha a ni a, hemi tum hian anmahni tantute hnenah ticket man an pe kir hial a. He thil thlen hnuah hian Manchester United hnehtawk leh tawh mah se St James Park-a thil thleng ang bawk kha a thleng leh dawn emaw tih mai turin minute minute 15 lek chhungin goal thum an chhuah hman.

Liverpool hian minute thumna leka Curtis Jones-a hmanga goal hmahruai an thun chu minute hnih hnuah Luis Diaz-a’n a chhunzawm a. Penalty atangin Mohamed Salah chuan a thun belh zui bawk.

Spurs hian Tyneside-a an thil tawn ang erawh tawng nawn duh tawh bik lo, Ningani zanah manager thar, Ryan Mason-a hovin United lakah pawh si hnih an phurh sut zovin point an hlawh thei tih an inhria a, point hawn ngei an tum.

Chawlhlawk hma chiahin Harry Kane chuan si khat a sut a. Minute 77-ah Son Heung-min chuan thun velehin 3-2 a ni ta.

Minute 84-ah Mason chuan Richarlison a tir lut a, minute 93-ah Lucas Moura tihsual zar zovin tun season-a league-a a goal hmasa ber a thun zui a, 3-3 a ni.

Heti hian tawp sela chuan Spurs hian pangana dinhmun hauhvin kartawp an hmang liam thei tur a ni a; mahse, a ni tlat si lo.

Minute khat pawh a la liam mang lo tihah Brazilian forward ang bawka second half-a dah luh, Jota chuan Liverpool tan a thun ve leh ta tlat a, hun a tawp zui a, an tumpui chu paruknaah an tla nghal a, panganaah an zuan khalh leh ta nghal chiah a ni.

Liverpool hi April thla tira Manchester City-in 4-1 a an sawp hnuah vawi ruk khel tawhin tlawm an nei zui ta miah lo va, Chelsea leh Arsenal an hnehtawk hnuah vawi li an chak zawn ta a, March thla tir lam thlenga talbuai anga sawi theih kha tunah chuan khelh nga hmabak an la neihah panganaah an awm ta.

Champions League khel thei tur hniam ber ni mek, United chu point sarihin an la phak lo va, an hnuaiah Spurs awmin point hnihin an tlansan a, London club aiin an la khel tlem zawk bawk.

Spurs ve thung hi an khelh hnuhnung pali atangin point khat chiah an hlawh chhuak a, vawi thum an tlawm a, heng zingah hian Magpies laka goal ruk an chhuahna pawh a tel.

March thla chawhnu lama Antonio Conte an chhuahtir hnuah Cristian Stellini-a’n vawi hnih kaihruaiin tunah Mason-a hnuaiah vawi hnih an inlanna a ni a. Khelh hmabak vawi li an la neihah Champions League a huphurhawm tan ta deuh.