Aizawl March 8, 2023: Vawiin khan International Women's Day, 2023 puala AIKO buatsaih chu Hotel Regency Conference Hall-ah hman a ni a, khuallian I&PR Minister Lalruatkima chuan hmeichhia te hmasawnnaah mipa ten inzirna tur tam tak kan nei a ni, a ti. International Women's Day, 2023 thupui hi 'Embrace Equity' a ni.

Khuallian Lalruatkima chuan, "Khawvel pawhin a ngaihpawimawh international Women’s Day hman a ni hi a lawmawm. Tun dinhmunah chuan hma kan sawn tawh hle in a lang a, ram leh khawtlang hruaituah pawh hmeichhia an awm ve ta nawk mai. Office-ah te pawh hmeichhe officer kan ngah em em a, zirna lamah lah ni se hmeichhia ten hma an hruai deuh zel tawh a ni. Hmeichhia te hian fak an phu a, inchhungkhur chhung chet zawng zawng an kut a ni a, khawsak rel nen, naupang buaipui nen, heti chung chung pawha hma an sawn thei hi, mipa te hian inzirna tur tam tak kan nei a ni," a ti.

Khuallian chuan, “Mipa ropui tak phen ah chuan hmeichhia an awm thin,” ti te pawn an lo sawi hial thin. "Mipa te hian keimahni chauh chuan kan nih tur ang hi kan ni phaklo fo thin a, 'Pathian pawh in mipa tanpui turin a kawppui tur awm mi hmeichhia ka siam ang e,' a lo ti reng a ni," a ti.

Minister chuan, "Artificial Intelligence System-in a zirchianna ah chuan za zela 44 ah chuan mipa leh hmeichhe in thliarna a awm a hriat a ni a, khawvel ram 125 a hmeichhe journalist te an survey na ah chuan 73% te chuan an hnathawhna ah online a invaukhanna (violence) an tawk thin ni a hriat a ni. Heng thil te hi UN in a la thutak viau mai a, tun kum International Women’s Day Theme atan pawh 'Embrace Equity' tih a thlang hial a ni," a ti a. 

India sorkar pawhin hmeichhia te dikna chanvo hi a ngai pawimawh tih sawiin Minister chuan, "Women Commission te din in, Municipal Corporation ah te pawh seat reserve sak hial a ni tawh a, hmeichhe councellor te pawh mipa aia an duai na bik engmah hmuh tur a awm lo. Ram rorelna politics-ah pawh reservation hmeichhia ten an neih hi ngai hlu in, kan tel ve na tur a ni," tiin hmeichhia ten tan la zel turin duhsakna a hlan a. 

Khuallian chuan, "Pathian hian mipa leh hmeichhia a siam a, in mamawh tawn kan ni a, mipa amahin a kal theilo a, chutiang bawkin hmeichhia pawh amah in a kal thei hek lo. Chuvangin in zah tawn a, tanpui kan ngaihna laia intanpui tawn zel hi a pawimawh lai chu a ni. Hmeichhia a awm nem zawk te hi kan duat thiama, hmeichhia te pawn Pathian min siam chhan hre rengin in chawimawi tawn tur kan ni tih kan hriat reng a pawimawh a ni," tiin kumin 2023 International Women’s Day hmangtu te duhsakna a hlan a ni.

Khuallian Lalruatkima chuan Mizo hmeichhe chhuanawm te- Padma Shree B. Sangkhumi, Lalriliani, Marlee Vankung leh Er. Lalhmingliani te hnenah chawimawina thilpek a hlan nghal a ni.

He hun hi R. Vanlalena, Adviser AIKO chuan a kaihruai a, Maggie L.Ralte, Chairman AIKO chuan kalkhawmte lawmna thu a sawi. He hunah hian CYMA, MHIP, MUP, MJA leh pawl dang aiawhte pawh an tel a ni.