ZALEN November 12, 2023 : Mizoramah mipa leh mipa inkawp thin 'men who have sex with men' (MSM) mi 919 leh hmeichhe inzuar 'female sex worker' (FSW) mi 898 chhinchhiah an ni.

ZALEN in Mizoram State AIDS Control Society thawktute hnen atanga thu a dawn danin September 2023 thlenga MSACS in mipa leh mipa inkawp (MSM) chhinchhiah an neih zat chu 919 a ni a, Mipa inzuar an awm leh awm loh chungchangah erawh record an neih loh avangin an hre lo tih an sawi.   

MSM an pun leh pun loh chungchang zawhna chhangin MSACS thawktute chuan MSM programme kalpui tan tirh 2007 atanga 2023 thleng khaikhin chuan an pung tih an sawi.

Amaherawhchu kum 2007 hi chuan Aizawl ah chauh project an nei a, kumin 2023 ah erawh project 4 (district 4) ah kalpui anih avangin a pung lo thei lo niin an sawi a. "Keini hian a lo awm sa (ni sa) te kan enkawl mai chauh a ni a, hei hian an pung nge pung lo a hril lem lo a ni," an ti.

MSACS thawk te chuan tuna MSM an enkawl laite zingah HIV positive enkawl lai mi 98 an awm mek niin an sawi bawk.

ZALEN zawhna chhangin MSACS thawktute chuan Mizoramah hmeichhe inzuar (FSW) awm zat chiah an hre lova, mahse enkawl lai an neih chu 898 an ni tih an sawi a. FSW chi hrang hrang leh rate hrang hrang an awm leh awm loh chungchangah hetiang sawi hi chu hre mah se, official chuan record an nei lo niin an sawi a. FSW te hi khawpui lun lai deuhah te an inzuar tlangpui nia an hriat thu an sawi.

MSM leh FSW te himna atana MSACS hmalakna chungchang zawhna chhangin MSM leh FSW te himna atan hian condom te pe in, him zawka sex hman dan, HIV test leh counselling neihpui, inentir tur kawhhmuh, anmahni tanpuitu tur zawnpui hna te an thawk tih an sawi a. "MSACS project chuan an hriselna lam a ngai pawimawh ber a, a bikin sex atanga inkaichhawn theih natna laka venhim leh enkawl a ni deuh ber a ni," an ti bawk.

Mizoram State AIDS Control Society chhinchhiah danin October 1990 atanga September 2023 thleng khan Mizorama HIV positive hmuhchhuah tawh zat chu 29514 an ni a, heng zinga 18333 hi mipa niin hmeichhia 11181 an awm bawk. HIV inkaichhawnna te chu mipat hmeichhiatna (heterosexual) atangin 63.88%, homosexual/ bisexual 1.48%, hriau thianghlim lo hman atangin 30.67%, nu atanga naute ah 2.65% leh a kaina chhan hriat loh 1.33% te an ni.