Aizawl: AMC leh ACBOA te'n khawpui chhungah bus ding mai mai lo tur Greenline Express tlantir turin an inpuahchah a, Mission Veng *(Dawrkai Veng) - Zemabawk Express hi tan mai thei dinhmunah ding tawhin stand 6 chauha a din dawn avangin bus service panngai aiin a kal tumna a thlen hmasak beisei a ni a, lirthei te (car, taxi etc) a chuan aiin a man man zawk tura beisei a nih thu Zalen in a dawng. Greenline Express City bus stand 6 chauh nei hi stand a nghaktute chauh a phur dawn a, passenger chhuk tur leh chuang tur an lawn fel hnuah ding khawmuang loa tlan leh nghal tur a ni. Seat awmzat chiah chuan phal a nia, chuan man pawh bus service panngai aia tamin stand hmasa berah Rs 20 niin stand khat zelah Rs 10 in a pung dawn niin thulakna chuan a tarlang. “AMC Parking committee rawtna Executive in a pawmpui hnuin Aizawl City Bus Owners Association chu thurawn pe turin lehkha a lo kal a, bus serivice pangngai hi stand 23 laiah a ding a, pisa kai,hmanhmawh bik leh Sikul naupang te leh a mamawh tan tiin Greenline a piang ta a ni,” P Sanghmingthanga chuan Zalen a hrilh a ni. Zemabawk thleng turin taxi in Rs 350 sen a ngai a, Express chu a tlawm zawk niin a sawi bawk. Hemi enkawltu Executive Councillor Rosiamngheta chuan, “Sawisel kan tawk nual a, mahse kan han enchhin zel anga siamthat ngai te tihdik zel kan tum a, mi thenkhat chuan thil inthlak ‘change’ an hlau a, an awm dan pangngaia awm an duh a, mahse chu chuan hmasawnna thlen lovin hnung tawlh zawngin min kal tir zawka ni,” tiin a sawifiah bawk. Seat limit pel a passenger phur phal loh a nih rualin hman hmawhna pawimawh neite chu traffic lamin an ngaihna thiam dawn niin Zalen document blakchhuah chuan a tarlang. Greenline sawi ho hian AMC, ACBOA leh Traffic te an thukhawma dinna (Stand) tur leh marking te siama enfel hian ni 25/6/2015 khan an thawk chhuak a, nizan thleng khan an la thawk a ni. * (Thakthing Bazaar tia sawi lar tak hi Dawrkai Veng tih thin a ni- Ed)