Tun hnaiah Speaker chuan Serchhip bialtu MLA Lalduhoma chu dan a bawhchhia a ni tiin MLA atangin a chawlhtir a. Speaker thutlukna hian inhnialna a chawkchhuak nghal a, ZPM lamin dan dik lovin Speaker hian a ban nia an sawi laiin dan dik tak hmanga MLA atanga chawlhtir niin mi tam takin an sawi bawk.

Engpawhnise dan dik a nih leh nih loh hrilhfiahtu tur ber chu Law Court a ni a, ZPM te hi court ah kal se chuan Speaker in dan dik taka ro a rel leh rel loh a hriat mai dawn a. Mahse mipui Court lama kal an tum tak avangin MLA atanga Lalduhoma ban anih chung-chang hi dan a nih leh nih loh chung-changah inhnialna a awm reng tawh dawn a ni.

ZPM lam chuan Serchhip bial by election atan hian Lalduhoma bawk din tir leh an tum tih an tichiang nghal a. A tlin tur leh tlin loh tur chungchang chu Serchhip bial mipuite duhthlanna ah a innghat dawn ta a ni.

Mizoramah hian tum engemaw zat by election hi neih a lo ni tawh thin a, ruling lam chu an tling deuh zel a ni. Serchhip bial chungchangah hian enge thleng dawn hriat lawk a ni lo a, MLA atanga chawlhtir anih avang hian Lalduhoma hian mipui khawngaih hlawhin a hma aiin nasa takin vote a hmuhbelh thei a. Chutih rual erawh chuan hetiang deuh hlek hian Chief Minister hlui Laldenga a boral avangin a bialah by election neih a ni a, a nupui ngei a din pawhin a tling zo lo a, a dinhmun hi a ngaihtuahawm hle thei bawk. By election neih hunah meuh chuan mipui ten ZPM an khawngaihna leh lainatna hi a reh hman ve thei bawk a, chuvangin tunge tling ang tih hi hriatthiam a har hle. Serchhip bial mipuite hian ruling nge an duh eptu MLA tih chu an kutah a awm ta a ni.