Aizawl: AMC leh Food & Drugs (F&D) Administration chuan mipuite hnena ei leh in him leh hrisel chhawp chhuah a nih theihna tura hmalakho an tum. Health & Family Welfare Department hnuaia Food & Drugs (F&D) Administration leh Aizawl Municipal Corporation (AMC) tangkawpte chuan Zirtawpni khan AMC Conference Hall-ah inkawmhona hun an hmang a. Inkawmhonaah hian AMC lam atanga thusawitu Dr. Lalthanthuami chuan AMC huamchhunga Local Council-te hmalakna kal lai tarlangin leilung ti chhetu plastic leh polythene khapna dan kenkawh a ni dawn tih sawiin, hemi atan hian No Plastic exhibition neih a ni dawn tih a sawi a, veng bakah office leh sikul fai thlanna kalpui tum anih thu a sawi bawk. F&D Dy. Director F.Lalliantluanga chuan khuahkhirhna dan khauh tak hnuaia damdawi zawrh leh hralh chhuah a nih dan te, damdawi tha lo leh dik lo zawrh a pawizia leh hemi kawnga tanrual a pawimawh zia presentation hmangin a entir a. Food Safety Officer Lalrinkimi Pachuau hnen atangin eitur him leh hrisel neih theihna tura zuar chhuaktu leh siamtu te bakah mipuite tih tur hrang hrang presentation hmangin a tarlang bawk. Inkawmhona ah hian damdawi hmansual laka thalaite venghim tura tan ho dan tur bakah damdawi dik lo leh hmansual theih chi hote diklo taka zawrh leh hralh te dona kawnga thawhho dan turte sawiin ruahmanna siam ho a ni. Inkawmhona hi AMC Commissioner Dr.H.Lalthlangliana’n a kaihruai a, Aizawl huamchhunga Local Council member 200 chuang an kalkhawm a ni.