ZALEN June 7, 2026 : Mipuite kawng kânna atana ruahman, zebra crossing chu mipui leh lirtheih khalhtuten an zawm that vangin Traffic Police-ten lawmawm an ti hle.

Aizawl City Traffic SP C.Vanlalvena chuan, “Zebra crossing chungchangah keini chuan mipui leh lirthei khalhtute zirtir hna kan thawk a, an zawm that vangin lawmawm kan ti hle a. Duty awm loh lai pawh nise tha takin zawm chhunzawm zel ila kan duh hle,” a ti. 

Zebra crossing zawm that loh vanga man an awm tawh leh tawh loh zawhna chhangin Traffic SP chuan, “June 1,2026 atang khan khauh deuh zawkin kalpui a ni a. Tun dinhmunah chuan inzirtirna lam kan uar hrih avangin inman rup rup lam chu kan la ti lo a. Hmalak tirh a nih bawk avangin khauh lutuk chuan kan la kalpui lo a, dan bawhchhia an awm reng a nih erawh chuan a tul angin hmalak chu a la ngaiin a rinawm,” a ti.

Zebra crossing-ah chuan mipui leh lirthei khalhtute inngaichang tawn thiam se an duh tih a sawi bawk.

Traffic Police hian a khât tawkin Aizawl khawpui hmun remchangah surprise checking neih zel an tum tih a sawi a. Lirthei khalhtute chu man ngai lova dan zawm turin an ngen tih a sawi bawk.