Aizawl: 1st Bn. MAP te chuan mipui te nen thawhhona tha neih zel an duh tih an sawi. Zirtawpni tlai khan Aizawla chanchinbu mi thenkhat chuan Armed venga 1st MAP hmunhma an tlawh a, Commandant PC Lalchhuanawma leh Officer te nen inkawmhona hun tha an nei. Press mite nen an inkawmna ah police hotute chuan mipuite nen thawhhona tha tak neih chhunzawm zel an duh tih an sawi a. Tuna field an neih mek leh basketball court an siam mekte chu veng mipuiten an chhawr tangkai atan an siam tih an sawi a. An venga mitthi an awm chuan Battalion-in programme lo siam tawh mah se sipaihote an tel theih nan an thulh thin niin an sawi. 1st MAP hian infiamna hmunhma leh thil dang bakah ni zung hmanga tui tihthianghlimna te, park, mau leh thing chinna te an siam thar a. Ni zung hmanga tui tihthianghlimna (solar based water treatment plant) hi Inter Energy Ltd. Gurgaon nen tangkawpin siam a ni a. He treatment plant hian ni khatah tui thianghlim litres 15,000 a pechhuak thei a ni.