ZALEN August 13, 2026 : Mualthuam North Village Council (VC) leh YMA te chuan khawtlang mipuite thlamuang tak leh thlabar loa an awm theih nan naktuk zan atangin tlaivara duty an tum.

H. Ramdinpuii D/o H. Lalawmpuia chu Mualthuam khawtual ngeiah rapthlak taka thah a ni chu Mualthuam North VC leh YMA te chuan pawi an tih thu an sawi a. Tualthattu chu man chhuah nghal leh a phu tawk hremna pek an duh thu an tarlang.

Mipuite an thlabar tih an hriat avangin VC leh YMA te chuan tualthahna thubuai hi hnu chhui zawh a nih hma chu zan tin tlaivarin duty an tum a. Zan rei lamah lirthei tlan ri emaw an hriat pawhin mipuite chu hlauhthawng lo turin an ngen.

Tualthahna thubuai chhui chhuahna atan hmanrua tangkai tak emaw, evidence emaw, thil hriat neite chu VC emaw, YMA OB te hnenah emaw hrilh turin an ngen bawk a. Zu leh ruihtheih thil ti thinte pawhin khawtlang mipuite tithlabar zawngin awm khawm emaw buaina siam lo turin an ngen.

Thenzawl Vengthar lamah VCP hming leh YMA President hming ang emaw, police nia inchhal ten mi an va be buai thin nia hriat a nih thu an sawi a. Khawtlang mipuite chu mi va tibuaia phone buai tawh lo turin an ngen thu thuchhuah chuan a tarlang.

Police te an khuaah awm lo mahse an beidawn vang emaw an zuzi vang emaw a ni lo tih mipuite an hriattir a. Evidence an lak khawmte nen chak zawka hma lak an tum avanga chhuk an ni tih hria a, a tul chuan an khuaah an lo chho leh thin dawn tih an sawi.

Mualthuam North VC leh YMA te chuan tualthahna rapthlak tak chu rang taka chhui chhuah a nih theih nan thil hriat leh hnu chhui kawnga hmasawnna tur neite chu zep nei loin khawtlang hruaitute hnenah hrilh turin an ngen. H. Ramdinpuii tualthihna thubuai chu dik taka hriat chhuah a, a titu man chhuah vat a nih theih nan khawtlang mipuite tanpuina an ngen tak meuh meuh a ni.