ZALEN November 24, 2025: MNF Senior Vice President Dr. R. Lalthangliana chuan LADC inthlan lo awm tur campaign-in vawiin hian Cheural, Lungtian-1, Lungtian-11, Rawlbuk, Lungpher, Siachangkawn, Vawmbuk, Bualpui NG leh Lungzarhtum khuate a tlawh a, ZPM chu tih theih loh turin an inzuar a, mipuiin an enchin a, an nihna an chiang tawh a, an sawrkar hnua inthlanah an tla hniam char char a, a ti.

Dr. Thangtea chuan, "Vawiina sawrkar mek ZPM hi kum hnih em pawh an sawrkar hmain, inthlan a piangin hniam lam an pan zel a. An sawrkar tirh, an vung vanglai takin nikumah Sinlung Hills Council General Election-ah nasa takin an tla a, hneh takin MNF kan tling thung. An thuneihnain Aizawla Local Council leh VC inthlan an pawt hnai lui a, an boruak that lai tak nia an hriatah inthlan an buatsaih a. Hetah hian sawrkar kal tawhte ang lo takin nasa takin an hniam rawih rawih a ni." 

"Congress leh MNF kan sawrkar lai khan hetiang inthlanah hian nasa takin rulling kan tling zel thin, kan sawrkar lai khan Local Council seat 85 awmah seat 78 kan la a, 90% aia tam seat kan la thin. Tun tumah Local Council leh VC-ah a zahve pawh ZPM chuan pha lovin 50% pawh an la pha ta lo. Tunah Dampa bial MLA by-election ah Pathianin hnehna min pe leh bawk," a ti.

MNF Vice President chuan, "MNF leh Congress kan sawrkar thin lai khan kum hnih khat lekah mipuiin tun ang em em hian an nin an sawi ngai lo. ZPM sawrkar an ninna chhan ber chu, thiltih theihloh tawp ti turin mipuiah inthlan laiin an in zuar nasa a, mipuiin an enchhin a, an nihna an chiang ta hle a, mipuiin kiltin atangin an hnawl mek a, kum 2028 MLA General Election-ah chuan mipuiin MNF sawrkar thar an piantir leh ngei dawn a. Chuvangin, LADC-ah pawh kum 2028-a MNF sawrkar thar thawh tlangpui chhunzawm nghal tur MNF leh a thawhpui MDC official candidate-te hi lo vote vek turin ka ngen tak meuh che u a, in inchhir lo hlein ka ring," a ti bawk.

Dr. Thangtea hi Cheural khua hian Dampa bial by-election ah MLA a thlan thar a nih avangin lawmpuina cake an lo buatsaihsak chu a zai nghal a ni.