ZALEN January 18, 2026: Nikum chhung khan Mizoram hmun hrang hranga service, Pawan Hans Helicopter-ah passenger 7,247 an awm a. Mizoram sawrkara Civil Aviation thawktute chuan helicopter service chu mipuiin an chhawr tangkai hle tih an sawi.

Civil Aviation thawktute hnen atanga ZALEN thudawn danin nikum chhung khan January-ah passenger an tam ber a, 896 an tling a. February-ah 840, March-ah 578, April-ah 518, May-ah 388, June-ah 469, July-ah 333, August-ah 363, September-ah 521, October-ah 733, November-ah 796 leh December-ah 812 passenger an awm.

Civil Aviation thawktute chuan Mizoram hmun hrang hranga service mek, Pawan Hans Helicopter chu mipuiin an chhawr tangkai hle niin an sawi a, tun dinhmunah helicopter service pakhat a awm thu leh a dang service belhtir tumna a awm rih loh thu an sawi.

Thudawn danin helicopter hi passenger phurhna mai bakah casualty evacuation (damlo serious) phurhna atan life saving mission pawh tangkai taka hman a ni.

Mizoram helicopter service mek atang hian kum khatah Rs. Vbc. 33 vel hmuh thin a ni a. State sawrkarin kum khatah Rs. Vbc. 2.5 vel a seng ve thin.

Mizoram sawrkar chuan mipuite chhawk zangkhai tur atan tangkai taka hman turin Pawan Hans Helicopter Ltd. nen inremsiamin Mizoramah August 20, 2012 atangin helicopter hi service-tir a ni.

Hemi atan hian Ministry of Home Affairs (MHA)-in dan a lo siam angin a senso (expenditure) 75% chu Ministry of Home Affairs (MHA) pek a ni a, 25% chu state sawrkar tum a ni.