Aizawl; Congress Legislature Party Treasurer leh Minister ni bawk Zodintluanga chuan, "Mipuiin MNF-ah rinna an nghat zo tawh lo," a ti. Nimin Congress Bhavan a Aizawl District Congress Committee (ADCC) in Extended Committee an neih ah he thu hi sawiin Zodintluanga chuan,"MNF President hi vai ni lo Mizo faten term hnih an hnawl tawh a, a kaihhruai ten an chhuahsan mek a ni," a ti. A kaihhruaiten an party president-ah rinna an nghah zawh tawh loh avangin harsat na an tawk mek tih Zodintluanga chuan a sawi a, "Mala an sawrkar an ring zo tawh lo a, nasa taka an inbeihpui thin Pu Lalduhoma te nen platform khatah an awm a, eng chen nge an thlen kan en dawn a ni," a ti. Mipuiten ram kaihhruai turin midang an hmu lo tih sawiin ZNP chu inthlan hnuhnung berah pawh an hotupa ber atangin an paih tih a sawi a. Congress kaih hruaina hnuaiah mipui thla a muang tih sawiin, "Hma kan sawn mek zel a ni," a ti. Aizawl Municipal Council (AMC) Chairman tharin rorelna an chan tak hnua a thusawi chu mak a tih thu UD&PA Minister chuan sawiin, "AMC chairman-in charge a la a, a thusawi hmasak ber chu 'a mawm ngai lote kan mawm ve tawh dawn' tih a ni a, hetiang ramhruaitu hi kan mamawh lo a, a daih rei dawn lo a ni," a ti bawk.