Aizawl: India ram khawpui engemaw zata service mek Ola Cab chuan Aizawlah service ve tumin an thlithlai mek. Mizoram sawrkar chuan mipuiten man tlawm zawka lirthei an hman theih nan leh kawngpui tawt lutuk tihziaawm nan Ola hi Aizawlah service turin an sawm a. Ola sawm an nih chhan hi mipui tan a him vang niin an sawi bawk. Thudawn danin Ola pawh hian Aizawl ah service theih a ni em tih hi an rawn enfiah tawh a, Aizawl map pawh neiin internet service pawh a tha thawkhat niin an hria a; mahse, Taxi neitute atanga dodalna a awm avangin an tum angin hma an la chak thei lo nia thudawn a ni. Taxi neituten an dodal chungchangah hian UD&PA thawktute chuan, “Khawpui dangah pawh an luh tirh chuan dodalna an tawk thin a; mahse, an rate a tlawm avang leh a him avang hian Aizawl a service tur hian kan ko lut zawk a ni,” an ti. Ola hi hmarchhak bialah chuan Guwahati-ah chiah an la service a, Aizawlah hian hman ve a nih chuan hmarchhak state zingah a pahnihna tur a ni. Ola hi internet hmanga taxi book-na a niin ‘Ola apps’ download-in mahni awmhmun atangin taxi koh theih a ni a, a service zinga a hnai berin an la/phur thin a ni. %%%%%