ZALEN December 30, 2025: Home Minister K. Sapdanga chuan Mizoram mipuite leh Zo hnahthlak ram pawna awm zawng zawngte Krismas leh Kumthar Chibai a buk a, halpuah leh halmawi hal kawngah mipuite insum hram hram turin a ngen.

Home Minister chuan, "Kum 2025 Krismas chu Mizoram mipuiten boruak ralmuang tak hnuaiah hlim takin kan lo hmang liam ta. Thahnemngai taka tawngtai thin Kohhran mipui te, Veng tina zankhuaa duty thin tlawmngai pawl hrang hrang te leh, dan kengkawhtu Police leh Excise force te thawhrimna avang a ni a, mipuiten thu kan awih tlan avang a ni bawk a, hengte avang hian, mi tinte chungah lawmthu ka sawi e," a ti.

K. Sapdanga chuan, "Tunah hian kum 2026 kumthar lawm turin kan inbuatsaih leh mek a. Nikum lamah khan dan tlawhchhanin, halpuah leh halmawi hal lo turin kan inngen a, mi tam zawkin kan zawm tha hle a, lawmthu ka sawi a ni. Halpuah leh Halmawi hal hi a nuamin, a hlimawm hle mai a, han inkhap leh ti lo tura han inngen te pawh a hrehawm khawp mai. Mahse damlo leh mi chaklo zawkte hian, halpuah ri leh halmawi khute hi an manganphah em mai a, hei vang chauh pawh hian, insum hram turin mi tinte kan ngen leh a ni," a ti.        

Mizote chu tanpui ngaite tanpui thin, khawngaihthlakte khawngaih thin, thlaphangte thlamuan thin, lusunte pawh tlaivara tawrhpui thin hnam, kha Zo nun ze mawi kha lan chhuahtir thar leh ila. Halpuah leh Halmawi hmangin tumah thlabarin siam a. Nu leh Pa te, Thalaite leh naupangte zah tak chungin, he ngenna hi a siam a, Kum 2026 kumthar atan mi tinte chibai a buk a, duhsakna sang ber a hlan.