Aizawl February 14, 2023: PC Party President Vanlalruata chuan,"Kan budget tharah chuan FATU hlui a buk tha leh hle a; Krismas ruai a fatu tâna bel 78.90 daha mipui tâna theh tûr bel 22.09 hun chhuah ang chauh a ni a. Hetiang khawpa mipui chan tlem hian Krismas ruai han siam ila chu Upa ho kan sêl nasa teh ang chu," a ti.

Vawiin PC Party hruaitute an Office lailawk Zalûta building-a inhmukhawmte hma-ah Ruata chuan,"State budget han tih hluai hian thenkhat chuan kan hriatthiam phâk loh thil emaw kan ti thin. Hriatthiam awlsam dân ber chu Krismas ruai ang deuh hi a ni mai," tiin, "Krismas ruai kan theh dawn chuan ruai theh nâna kan mamawh chhût chhuak in chuta senso tûr chu mi hrang hrangin kan thawhkhawm tûra ruahman thin a ni a, kan thawhkhawmin a daih lohna chu Kohhran committee in a phuhrûk dân an zawng leh mai thin," a ti.

State budget chu ruai sa bel nen tehkhinin, "Kan State Budget chu sa bêl 100 chhum tûr anga ruahman a ni ta a; He bêl 100 tûr zînga bêl 81 deuhthaw (80.84%) hi mipui thawh tûr leh mipui tâna Central atanga pawisa lo kal tûr hmanga lei tûr a ni a; A bâk bêl 19 leh tlem (19.16%) chu a pûka pûk tur a ni. Hriatthiam loh tham a awm lo," a ti.

"Kan ruai theh tûr sa bêl 78 deuhthaw (77.89%) hi hlawh leh inrelbawlna atâna hman tûr niin FATU hlui-ah a kal ta a. Bêl khat pawh tling lo (0.01%) chu rulh leh tûra midang pûktîr tûr nîin hei hi MLA te pûk tûr anih avangin FATU hluiah bawk a kal dâwn a. Tichuan, FATU hluiah bel 78 deuhthaw (77.90%) dah a ni tih sawiin PC President chuan, ”Sa bêl 100 ngawt awmna ruai chu kan tlai dawn mang e ti a phûr taka ruai theh tum mipui tân bêl 22 leh tlem (22.09%) chauh an zuah ta anih chu! Eng anga ngaih chi tak ni maw?” a ti. “Mipui thawhkhâwm leh mipui tâna bêl 81 deuhthaw (80.84%) anih laiin mipui theh tûr bêl 22 leh tlem (22.09%) chauh a awm a nih chu! “ a ti bawk.