ZALEN December 9, 2024: ZPM Party chhung inkhawma thusawitu Agriculture Minister PC Vanlalruata chuan, “Campaign laia kan lo aupui tawh angin thlaithar lei turin Pu Lalduhoma kaihruai ZPM Ministry chu a inbuatsaih mek a, mipuite tih beidawn kan tum lo” a ti.

Vawiina an Party Office-a hun an hmanah hian Minister chuan, “ZPM Party chuan campaign lai atangin Thlaithar lei chungchang kan lo au pui tawh thin a, kan lo aupui tawh ang ngeiin tunah hian thlai pali Sawhthing, Aieng, Hmarcha leh Hmunphiah te lei turin Marketing Board kan din ta a, he marketing Board hian chak takin hma a la mek a, tun hnai khan International Conclave Cum Buyer Seller Meet kan buatsaiha, India ram mai bakah ram hrang hrang atangin thlaithar ngaihventu an lo pung khawm a, Pathian zarah kan hma lakna a kal tluang hle a ni."

"Hetiang a nih mek lai hian mi thenkhat chuan thlaithar hi lei thei lo ila, mualpho takin Sawrkar hi awm se an duh emaw tihmai turin min chang reng a, nimahsela, Pu Lalduhoma kaihruai ZPM Ministry hian thlaithar hi kan lei ngei dawn a, mipuite tihbeidawn kan tum lo a ni,” a ti.

Marketing Board Chairman PC Vanlalruata chuan, “Kan ram a lo dinchhuaha, state dangte anga buh leh bala kan intodelh theih nan hma kan la mek a, kan hma lawkah hian Mamit leh Kolasib District ah Buhhum lei tan kan tum bawk a ni. Pathian zara kan tum anga kan kal zel chuan, kum 2028 MLA General Election ah pawh hahdam takin mipuiin Sawrkarna min pe leh mai turah kan ngai a ni."

"Campaign laia kan intiam ang ngeiin thlaithar lei leh hralh chungchangah hian ZPM Ministry chuan mipuite tih beidawn kan tum lo a ni tih hi mipuiten min lo hriatpui turin kan ngen a ni,” a ti bawk.