Mipuiten kan zawn hi Mauruangi ni lovin Bingtaii zawk a ni tih kan hre chhuak mek

Aizawl October 7, 2024 : Vawiin hian Mizo Hnam Runah Sinlung Hills Council inthlan, November ni 5, 2024-a neih tura MNF leh HPC (Reformed) candidate tur MNF President Zoramthanga chuan a puang.

He hunah hian Zoramthanga chuan thusawiin, "Sawrkarna siam mek ZPM te hian inthlan hmaa an intiam anga 'kan ti ang' an tih zawng zawng an ti lo a. 'Kan ti lovang' an tih zawng zawng an ti ta vek emawni tih mai tur a ni," a ti a. "Mipuiten kan zawn hi Mauruangi ni lovin Bingtaii zawk a ni tih kan hre chhuak mek a ni," a ti bawk.

Zoramthanga chuan MNF chu Mizorama political party awm mek zingah ruhrel lian ber leh minghet ngah ber an nih thu a sawi a. "MNF sawrkar lo awm tawhte khan Pathian malsawmna kan dawng nasa thei em em a. Peace Bonus te kan dawng a, MINECO din te, Lunglei kawng sial te, Millenium Centre sak leh hmasawnna ruhrel lian kan din tam hle," a ti a. "Pathian leh kan ram tan, tih thuthlunga ding tlat kan ni a, hei hi Pathianin kan felnaah min ruat sak a. Pathian leh kan ram tan mipuite rawngbawl leh turin MNF hi kan tho chhuak leh dawn a ni," a ti bawk.

He inkhawm hi Vice President Vanlalzawma'n a kaihruai a, Sinlung Hill Council Election Campaign Committee Secretary Lalmuanthanga Fanai chuan MNF leh HPC (R) thawhhona thuthlung a chhiar chhuak a. MNF Vice President Lalchhandama Ralte pawhin thusawiin, "SHDC Election lo awm turah hnehna chan ngei kan beisei a, HPC(R) nen thawhhona tha tak kan nei a, lungrual takin inthlan hi kan hmachhawn ho dawn a ni," a ti.

MNF leh HPC (R) Candidate te:

1. Khawlian - Rochungnunga, Khawlian.

2. Phuaibuang - Lord Joyfula, Phuaibuang.

3. Suangpuilawn - Vanlaltluangliana, Suangpuilawn.

4. Vanbawng - Ricky Lalremsanga - Vanbawng/Ramhlun.

5. Ratu - R Lalhmingthanga, Ratu.

6. New Vervek - C Lalnuntlanga, New Vervek.

7. Sakawrdai South - Lalhriatchhunga, Sakawrdai.

8. Sakawrdai North - Melody Lalchhuangzeli, Sakawrdai.

9. Zohmun - Benjamin Lalrawnliana, Zohmun.

10. North Ṭinghmun - R Lalfakzuala, Sakawrdai.

11. Saipum - Laldawmliana, Saipum.