Miss India Mizoram 2023 atan C. Lalhmangaihzuali (Zuali Chhangte) chu a tling a, ani hian Femina Miss India 2023 thlannaah Mizoram ai a awh ang. Zuali hi Miss Mizoram Organization hriatpuiin a tel a, a kal leh zelna turah ZALEN chhungkua chuan duhsakna kan hlan e. 

Zuali Chhangte hi Miss Mizoram 2020 thlannaah khan a lo tel tawh a, tawnhriat pawh a nei tha hle. Femina Miss India 2023 atan hian January thla khan audition an nei a, Mizoram aiawh turin a tling zui ta a ni. Miss India-a tel tur hian Miss Mizoram thlannaa tel hmasak kher a ngai lo a, Mizo khua leh tui tawh phawt chu criteria an tlin chuan an tel thei vek a ni. 

Femina Miss India 2023 atan hian inbuatsaihna kalpui mek a ni a, Grand Finale hi hmarchhakah nghah a ni dawn. Femina Miss India 2023 hi Manipur Tourism Department chuan a thleng dawn a, Grand Finale neih hun tur erawh hriat la a ni lo. 

Miss Mizoram Organization hriatpui a ngai em?
Femina Miss India chuan talent partner atan Miss Mizoram Organization a ruat tawh a, Miss India thlana reng rengah Mizoram aiawha tel turte chu Miss Mizoram Organization hriatpui an nih a ngai tawh. Hei hi Mizoram tan chauh a ni lo a, hmarchhak State te tan bika duan a ni. 

Hei dan thar hi Femina Miss India 2023 thlanna lo awm turah hman nghal a ni dawn a, hmarchhak atanga tel turte chu an state Miss Organization hriatpui an nih zel a ngai tawh a ni. Miss India thlannaah hian harsatna neuh neuh a lo awm tawh thin a, hemi sut kian nan hian an ruahman a ni ber. State hriatpuina tel loa tel an awm thin avangin he dan thar hi hman a ni a, State dangte erawh dan pangngaiin an kal chhun zawm ang. 

Miss Northeast Organization a ding
Tun hnai khan Miss Northeast Organization din a ni a, hetah hian hmarchhak State hrang hrangte an tel. Miss Northeast Organization hian an hriatpuina hmang chauha Femina Miss India-ah state represent-a an tel phasak tawh turin rawtna an thlen a, hei hi a lo remtih sak a ni. 

Hmarchhak state hrang hrang atanga tel turte chuan an mahni state theuha Miss Organization hriatpuina an lak hmasak phawt a ngai tawh a, an mahni thuin Femina Miss India-ah an tel ngawt thei tawh lo. Kum dangah chuan State Miss Organization hriatpuina tel lo pawhin a in contest theih a, mahse hei hian harsatna a thlen fo avangin dan thar hi an duang ta a ni. 

Talent partner
Femina Miss India thlannah hian State hrang hrangte chuan talent partner an nei thin a, mimal ruat an ni tlangpui thin. Mizoram tan pawh kum 2017 atang khan Jeremy Hauhnar chu talent partner atan hian Femina Miss India chuan a ruat a, kum 2022 thleng khan he hna hi a chelh nghe nghe. Mahse Miss India 2023 thlan atang chuan Miss Mizoram Organization chu talent partner an ni tawh dawn a ni.