Miss Mizoram 2024 atan Republic Hmarveng nula Jennifer Lalrinzuali Renthlei thlan a ni. 1st Runner-Up hi Saikhamakawn nula Evelyn Zachhingpuii niin, Rebecca Zothanpuii, Khawzawl chu 2nd Runner-Up a ni.

Miss Mizoram chu tunge?

Miss Mizoram atana thlan thar Jennifer Lalrinzuali Renthlei hi June 28, 2000 khan Jacob Lalrintluanga leh Zodingpuii te inkarah a lo piang a, Jenn emaw Rinzuali tia koh thin a ni. An unau zinga upa ber niin, Republic Veng, Aizawl-ah an khawsa mek a, Baptist Church of Mizoram (BCM) Kohhran an ni. A san zawng hi feet 5'8 zet niin, nula hleitling leh pian nalh tak a ni. 

Zirna lamah chuan kum 2017 khan NIOS atangin Class - X a pass a, HSSLC hi Home Mission School atangin a pass chhuak bawk. Kum 2023 khan Gov't Aizawl College (GAC) atangin B.A (Political Science) a zo a, an college miss atan pawh thlan a lo ni tawh nghe nghe. Miss GAC 2022 atana thlan a nih atang hian mi hriat a hlawh chho tan a, hmalan panin a kal chho ta zel a, tun dinhmun hi a thleng ta a ni. 

Miss Mizoram 2024 atana thlan a nih hma hian Miss thlanna hrang hrangah tawn hriat a nei tha hle a, Miss India Mizoram 2022 finalist a ni. Miss Northeast Diva 2023-ah khan telin, top 20 a lo inhlangkai tawh bawk. Hemi hnu hian Sikkim-a neih Miss Northeast 2023-ah Mizoram aiawhin a tel leh a, 2nd runner-up hial a ni leh bawk. 

Miss Mizoram 2024-ah phur takin a inlan a, a che vel a hmuhnawm thin hle. Catwalk-ah phei chuan a tha lawr tih ngam a ni a, intihsiakna hrang hrangah a duai lo hle. Kawng hrang hranga tehin Miss Mizoram nih phu berah endiktute chuan ngaiin, Miss Mizoram crown hial a hlawh chhuak ta a ni. 

Mizoram Journalist Association leh Zonet Cable TV tangkawp ten an buatsaih Miss Mizoram 2024 thlanna hi March thla atangin tan a ni a, April 26, 2024 (Zirtawpni) zan khan zawh fel a ni ta a ni. Grand Finale hi Sky City Hall, Saizahawla Arcade, Tanhril-ah neih a ni a, sub-title leh lawmman hrang hrang sem nghal a ni. 

Host Rin-i'n contestant te inhmelhriat tirna a neih hnuah zaithiam Ruatpuii a rawn che chhuak a, contestant te nen zai leh lamin hun an khuh hawng a ni. Lilac, Deborah leh Mizo Dance Camp te an perform a, sub-title hrang hrang sem a ni leh bawk. 

Winner - Jennifer Lalrinzuali Renthlei, Republic Veng

1st - Runner - Up - Evelyn Zachhingpuii, Saikhamakawn

2nd Runner - Up - Rebecca Zothanpuii, Khawzawl

Sub-title 

Grand Finale zan hian sub-title pali (4) - Miss Congeniality, Miss Beautiful Skin, Beauty With a Purpose leh People's Choice te sem a ni. Miss Congeniality sub-title hi Jennifer Zothanzuali kutah hlan a ni a, Lalrinhluii, Champhai District chu Miss Beautiful Skin atan thlan a ni. 

Beauty with a Purpose sub-title hi R. Vanlalawmpuii, Serchhip District hnenah hlan niin, sub-title ngaihhlut People's Choice chu rin lawk ang ngeiin Lalhmingsangi, Kolasib District hnenah hlan a ni. Bilkhawthlir nula Lalhmingsangi hian ngainat a hlawh a, mipui zingah tantu a ngahin social media lamah pawh a thawm a lian hle. 

Sub-title hi a hmain paruk sem a lo ni tawh bawk a, Miss Mizoram atana thlan thar Jennifer Lalrinzuali Renthlei chuan Miss Rampwalk leh Miss Photogenic la kawpin, Evelyn Zachhingpuii nen an langsar hle. 2nd Runner-Up Evelyn hian sub-title hlu tak pahnih - Miss Body Beautiful leh Miss Personality te a la a, atan hun hlu leh hriatreng tawh tur a ni ang. 

ITI nula Judith Lalramengmawii chu Miss Active atan thlan a ni a, M. Lalrinchhani chu Miss Talented atan thlan a ni bawk. 

Sub-Title Winner

Miss Congeniality - Jennifer Zothanzuali

Miss Beautiful Skin - Lalrinhluii, Champhai District

Beauty with a Purpose - R. Vanlalawmpuii, Serchhip District

People's Choice - Lalhmingsangi, Kolasib District

Miss Rampwalk - Jennifer Lalrinzuali, Republic Veng

Miss Photogenic - Jennifer Lalrinzuali, Republic Veng

Miss Body Beautiful - Evelyn Zachhingpuii, Saikhamakawn

Miss Personality - Evelyn Zachhingpuii, Saikhamakawn

Miss Active - Judith Lalramengmawii, ITI Veng

Miss Talented - M. Lalrinchhani, Siaha District

Top 10

Contestant mi 18 te atangin a thazual mi 10 thlan chhuah an ni a, judge te zawhna hmangin intihsiak an hmachhawn zui. Contestant te hian an mahni zawhna zawttu tur an pawt a, judge ten an duh duh an zawt a ni. Judge te zawhna hi a inpersan hlawm hle a, khawvel huap thil thleng atanga naupang enkawl leh Mizo society-a hmeichhe dinhmun bakah zawhna khirh khan tak tak zawh an ni.

Heti chung hian contestant ten zawhna tha takin an chhang thei vek a, top 10 atanga top 5 inhlankaipui theihna khawpa thain an chhang vek ti ila kan sawi sual awm lo e. 

Top 10:

1. H. Lalhriatpuii, Kanan

2. Lalsangkimi, Dinthar

3. Judith Lalramengmawii, ITI Veng

4. Lalrinhlui, Champhai

5. Lalhmingsangi, Kolasib

6. Evelyn Zachhingpuii, Saikhamakawn

7. Rebecca Zothanpuii, Khawzawl

8. Jennifer Lalrinzuali Renthlei, Republic Veng

9. T. Lalmuanpuii, Zemabawk North

10. R. Vanlalawmpuii, Serchhip

Top 5

Top 10 atangin a che tha zual mi panga (5) thlan chhuah leh an ni a, Rebecca Zothanpuii (Khawzawl), Lalhmingsangi (Kolasib), Jennifer Lalrinzuali (Republic Hmarveng), Evelyn Zachhingpuii (Saikhamakawn) leh Lalrinhlui (Champhai) te an tling. 

Top 5 te hi zawhna inang (common question) hmangin an intihsiak leh a, Lalhmingsang-i'n zawhna a chhang hmasa ber. An zawhna hi 'Kan chhehvel environment humhalhah kan thangharhin i hria em, environment chhe zel tur ven nana thil pawimawh min hrilh thei em?' tih a ni a, contestant ten an chhang tha tlang hle. 

Top 5:

1. Rebecca Zothanpuii, Khawzawl

2. Lalhmingsangi, Kolasib

3. Jennifer Lalrinzuali Renthlei, Republic Veng

4. Evelyn Zachhingpuii, Saikhamakawn

5. Lalrinhlui, Champhai

Lawmman 

Miss Mizoram 2024 hian lawmman atan pawisa fai Rs. 2,00,000 a dawng a, hei bakah hian Vespa Scooter a dawng bawk. Hei bakah hian Miss Mizoram hi main sponsor Women & Child Development (WCD) Department chuan ambassador atan an hmang nghal dawn a, Lash Studio ten deal tha tak an siampui bawk. 

Pahnihna (1st runners up) hnenah Rs. 1,00,000 hlan niin, pathumna hnenah Rs. 50,000 hlan a ni bawk. Pakhatna atanga pathumnate hi Lash Studio chuan hamthatna an pe vek a ni.

Miss Mizoram 2024 lawmman  

Winner : Rs. 2,00,000 + Vespa Scooter + WCD Ambassador + Lash Studio Deal

1st Runners-Up : Rs. 1,00,000 + Lash Studio Deal

2nd Runners-Up : Rs 50,000 + Lash Studio Deal

Top 5 : Rs 25,000 each

Top-10 : Rs. 15,000 each

Finalist : Rs. 10,000 each

Subtitle : Rs. 10,000 each

Zirsangpuii hun a liam ta

Miss kan neih tawh zinga entawn tlak leh ngainat hlawh berte zinga mi Miss Mizoram 2020 Zirsangpuii chuan Miss Mizoram a nihna chu Jennifer Lalrinzuali Renthlei hnenah a hlan chhawng ve leh ta a, stage-ah kohchhuah niin thusawina hun pek a ni. Zirsangpuii hian Miss Mizoram lo ni zel tur ten ngaipawimawh se a duh thil thenkhat a sawi a, final walk a nei nghal bawk. 

Mipui lawm a hlawhin thawm pawh a ring tha hle a, amah pawh a hnuk a ulh lek lek niin a lang. Amah bakah hian Miss Mizoram 202 top 3 te koh chhuah an ni a, an title kawl mekte an hlan chhawng hlawm a ni.