Aizawl April 20, 2024 : Miss Mizoram 2024 thlanna chu kalpui chhoh mek zel a ni a, intihsiakna hrang hrang kalpui mek a ni. Contestant te hi Zirtawpni khan Resort Wear shooting neihpui an ni a, Zonet Zawlbuk, HD leh Empai-ahte tihchhuah nghal a ni.

Miss Mizoram 2024 contestant te hian intihsiakna hrang hrang an hmachhawn chho mek a, April 17, Nilaini khan Glam Shoot leh Grooming te an lo nei tawh a ni. Resort Wear zawh hian sub-title hrang hrang semna hun an nei dawn a, April 23 hian result hi puan a ni ang.

Sub-title Night

Intihsiak hian a vawrtawp a theng chho mek a, Sub-title Night zawh hi chuan Grand Finale chauh a awm tawh dawn a ni. Kumin hian sub-title 10 sem chhuah a ni dawn a, contestant te theihna leh thiamna te phochhuahin a awm dawn. Sub-title hi - BWAP, Miss Beautiful Skin, People's Choice, Miss Congeniality, Miss Personality, Miss Talented, Miss Active, Miss Body Beautiful, Miss Photogenic leh Miss Ramp Walk te thlan a ni dawn a, Miss Mizoram nih theihna tura kawng pawimawh tak a ni dawn.

Grand Finale

Miss Mizoram 2024 Grand Finale hi April 26, Zirtawpni zanah neih a ni dawn a, lawmman sem nghal a ni ang. Grand finale zan hian District MJA lamte pawh tel tura beisei an ni a, an mahni District aiawhte tawiawm nghal tura beisei an ni. Miss Mizoram thlanna hi Zonet ten MJA nen tangkawpin changtlung takin an buatsaih a, Grand Finale bik phei chuan ngaihhlut a hlawh thin hle.

Lawmman tha

Miss Mizoram 2024-ah hian lawmman tha tak a awm dawn a, intihsiak buatsaihtute an fakawm hle. Lawmman tha tak a awm theih nan hian a buatsaihtute an thawkrim a, hei hi contestant te tan pawh chanchin lawmawm tak a ni. Miss Mizoram 2024 atana thlan hian lawmmanah Rs. 2,00,000 (nuai hnih) bakah, Vespa scooter a dawng dawn a ni - a vaia belhkhawm phei chuan tha tak a ni.

Hei bakah hian Miss Mizoram hi main sponsor Women & Child Development (WCD) Department chuan ambassador atan an hmang nghal dawn a ni.

Pahnihna (1st runners up) dawn tur pawh Rs. 1,00,000 lai a tling a, pathumnain Rs. 50,000 a dawng bawk ang. Pakhatna atanga pathumnate hi Lash Studio chuan hamthatna an pe vek dawn bawk a ni.

Heng bakah hian top 5-a tling te, top 10-a tling te, finalist leh Sub-Title lawmman dawngtute hnenah lawmman pawisa pek a ni dawn a, lawmman atana pawisa fai pek chhuah tur zawng zawng hi Rs. 6,55,000 zet a tling dawn a ni.

MISS MIZORAM 2024 LAWMMAN

Winner       : Rs. 2,00,000 + Vespa Scooter  + WCD Ambassador + Lash Studio Deal

1st Runners-Up   : Rs. 1,00,000 + Lash Studio Deal

2nd Runners-Up  : Rs 50,000 + Lash Studio Deal

Top 5       : Rs 25,000 each

Top-10       : Rs. 15,000 each

Finalist      : Rs. 10,000 each

Subtitle         : Rs. 10,000 each