Miss Northeast 2023 thlanna chu November 5, 2023 (Pathianni) zan khan Sikkim khawpui Gangtok-ah neih a ni a, Mizoram atanga tel Jennifer Lalrinzuali chu 2nd Runner Up Jennifer a ni. Miss Northeast 2023 atan hian Nagaland nula Kenei Ritse chu thlan a ni a, 1st Runner Up chu Assam nula Anamika Borah a ni. 

Miss Northeast thlanna hi nikum khan neih a lo ni tawh a, kumin hi a vawi hnihna a ni. Sikkim khawpuiah nghah niin, hmarchhak state pariat (8) atangin nula hleitling tak tak an fuankhawm. Mizoram atanga tel Jennifer Lalrinzuali hi a che chhe lo a, 2nd Runner Up a nih bakah, mimal lawmman 'Miss Rampwalk' a la bawk a ni. Jennifer-i hi Mizo zinga Miss Northeast thlannaa top 3 inhlangkai hmasa ber a ni nghal bawk. 

Miss Northeast hi hmarchhak huam chhungah chuan miss thlanna rintlak leh lian berah ngaih niin, hmarchhak state hrang hranga miss organisation te theuh intel khawmin an tlan a ni. Miss Northeast 2023 thlanna hun hi Sikkim Chief Minister Prem Singh Tamang pawhin a hmanpui a ni. 

Miss Northeast hi a vawi khat nan kum 2022 khan Nagaland khawpui Kohima-ah neih a lo ni tawh a, Meghalaya nula Irene Dkhar chu winner a ni. State hrang hrangah neih thin tura ruahman niin, Nagaland leh Sikkim ten an thleng tawh a ni.