Miss Universe a nih hnua Bollywood luhchilh zui ta Lara Dutta chuan lemchan a chawlhsan rih chhan a sawi a, hero te nupui lem emaw an bialnu lema tan reng chu a nin thu a sawi chhuak mauh mai. Lara Dutta hian chona hmachhawn tur a inpeih rih loh thu leh a fanu Saira tana hun tam zawk hman a duh vanga lemchan chawlhsan lailawk a nih thu a sawi bawk. 
Lara hian film turu leh bawnra pui puia chan ai chuan hun remchang a awm a nih chuan comedy film-a inlan a duh zawk tih a sawi a, shetiang lamah hian a inlan zui tawh dawn pawh a ni mai thei. 
Kum 43 mi Lara Dutta hi kum hnih liam ta khan film series pathum - Hundred, Hiccups leh Hookups-ahte a inlan a, a inlanna hnuhnung ber chu Kaun Banegi Shikharwati a ni. Hemi hnu hian camera hmaah a la inlan leh lo a, "Thla 18 liam ta chhung khan ka thawk nasa mah mah a, kum 6 liam ta ai khan ka inlan hnem zawk - tunah chuan chawlh hahdam ka mamawh rih e," tiin a sawi. 
Lara Dutta hi Femina Miss India 2000 atan thlan niin, Miss Universe thlannaah India ai a awh zui a, Miss Universe 2000 title a hawn zui a ni. Kum 1997 khan Miss Intercontinental atan thlan a lo ni tawh bawk a, Bollywood luhchilhin hlawhtlinna eng eawm zat a chang tawh. India rama film award ngaihhlut Filmfare Award pawh eng emaw zat a dawng tawh a ni. 
Andaaz (2003) chu a film chan hmasak ber niin, heng bakah hian - Masti (2004), No Entry (2005), Bhagam Bhag (2006), Jhoom Barabar Jhoom (2007), Partner (2007), Housefull (2010), Chalo Dilli (2011) leh Don 2 (2011) te chu a channa langsar zualte an ni.
Kum 2011 khan India tennis player chhuanvawr Mahesh Bhupathi nen inneiin, fa pakhat an nei a ni.