India chuan kum 1996 hnua a vawi khat nan Miss World thlanna a thleng dawn a, he hunah hian Karnataka nula Sini Shetty chuan India ai a awh ang. Kum 21 mi hi Femina Miss India World 2022 atan thlan a ni a, Miss World 2023-ah hian India mipui vaibelchhe tam tak aiawhin a ding dawn a ni. 

Delhi khawpuiah
Miss World 2023 thanna hi November/December-ah neih a ni dawn a, Delhi khawpuiah neih a ni ang. India hian kum 1996 khan a vawi khat nan a thleng a, kum 27 zet liam hnuah a thleng ve leh dawn ta a ni. Miss World thlanna hnuhnung ber kha San Juan, Puerto Rico-ah neih a ni a, Polish nula Karolina Bielawska chuan title a kawl mek a ni. 

Sini Shetty hi Mumbai-ah a piang a, Mumbai atang hian Karnataka-ah an pem. India-in Miss World a thlen kumah hian Sini Shettyhian Karolina Bielawska hnen atangin crow a rochun thei ang em tih chu hriat chakawm tawh tak a ni. 
Miss World thlanna hi tum 70 zet buatsaih a lo ni tawh a, ram hrang hrangah nghah kual thin a ni. Kumin hi a vawi 71-na tur a ni a, India chuan a vawi hnih nan a host ve leh dawn chiah bawk a ni. 

Miss World Organization chairperson Julia Morley chuan February 13 khan Miss World thlanna hi United Arab Emirates-ah nghah a nih tur thu a puang a, mahse hei hi an sut leh. Thla li a liam hnuah Miss World organization chuan thu thar an rawn nei leh a, India-ah ngah a nih tur thu official-in an rawn puang leh ta a ni. Kumin hian ram 92 tel tura beisei an ni.

Tunge Sini Shetty chu?
Karnataka nula kum 21 mi Sini Shetty hi nula hleitling leh duhawm tak niin, zirna lamah pawh a duai lo hle. Accounting & finance-ah bachelor degree a neih hnuin CFA professional course a zir leh bawk. Miss World 2000 Priyanka Chopra ngaisangtu niin, a ngaihsan thu hi vawi eng emaw zat a lo sawi chhuak tawh a ni.