American player Joseph Frederick Allen, Zonunsanga leh Lalrina Renthlei te pathum inkawpin Zarkawt BCA tan point 79 zet an  thawkchhuak a, Mission Veng Hotshots tan American player Joshua Aaron Keyes chuan an team point hmuh zawng zawng zatve point 42 a thawkchhuak chungin BCA lakah hnehna an chang zo lo. 

MSL 7-a hneh lo nei lova kal tluang Mission Veng Hotshots leh MSL hnuhnung bera Champion Zarkawt BCA te hi nizan June ni 7, 2022 khan in hmachhawnin Zarkawt lam hian point 16 zetin an hneh. He inkhelhah hian Zarkawt BCA hian point 100 an thun laiin Mission Veng Hotshots hian piont 84 chauh an thun thei thung.  

MSL-ah hian team an tam lo naa a tel chhun te erawh team tha tak tak an ni. Team tinin ram pawn leh state pawn player an kawl deuh vek bakah tualchhung Mizo player tha, kei ka ni inti chin chuan MSL hi an khel deuh vek. Chung team tha tlemte zingah BCA hi MSL 7-a hneh loh la tawng lo team awmchhun an ni. Khatla TBL leh Mission Veng Hotshots lakah an chungnunna an lantir tawh thei. MSL kaithar Mission Veng Hotshots hian, team thum hmachhawn tawhin an game khelh hmasa pahnihah an chak ve ve a, BCA laka an tlawn hma hian Chanmari Vikings leh Tuikual South te an lo hneh tawh. 

Quarter khatnaah Zarkawt aiin Mission Veng lamin bul an tan tha a, hun a tawp meuh chuan BCA ten point 27 chauh an thun theih laiin Hotshots lamin point 32 zet an score thung a, fans lam pawh an chawk phur hle. Mahse, Quarter hnihnaah erawh Zarkawt lam an chetha ve leh thung a, Mission veng-in point 17 an thun laiin Zarkawr hian point 20 an thun. Chawlhlawk hmaa an point dinhmun chu Mission veng point 49 niin Zarkawt lamin point 47 an hmu thung. Beisei lawk ang ngeiin an ram pawn player te an chetha hle bawk. 

Chawlhlawk zawha quarter an khelh leh hmasa berah Mission Veng Hotshots in point 22 an hlawhchhuah theih laiin, Zarkawt BCA lamin point 28 an hlawh chhuak thung. Quarter li naah hian team pahnih te chuan point an score hleithei lo va, Zarkawt BCA lamin point 25 an thun laiin MSV Hotshots lam phei chuan point 13 chiah an score thei. 

Total :                                     Period 1/ Period 2/ Period 3/ Period 4

Zarkawt BCA:                  100 -  27 -  20 -  28 -  25
Mission Veng Hotshots:   84 -32 - 17 - 22 - 13

Zarkawt BCA
Lalrina Renthlei - 30 pts - 4 rebounds - 6 assists - 3 steals.
Joseph Frederick Allen - 27 pts - 14 rebounds - 3 assists - 4 steals.
Zonunsanga - 22 pts - 6 rebounds - 2 assists.

Mission Veng Hotshots
Joshua Aaron Keyes - 42 pts - 8 rebounds - 3 assists - 2 steals.
Lalrozama - 14 pts - 3 rebounds - 3 assists - 3 steals.
Zonunsanga - 12 pts - 3 rebounds - 1 assist - 4 steals.