Aizawl: Nimin khan Mission veng chuan October thla chhung awh tur Faina beihpui hawnna leh hnatlangpui an nei. Faina beihpui hawnna hi zing dar 10 khan Synod Bookroom tualah neih a niin Mission veng Local Council chairman VL Chhuanawma chuan a kaihruai a, hawnna thu sawitu bialtu MLA Lt.Col. ZS Zuala chuan,  faina chu hmasawnna lantirtu pakhat a nih thu sawiin, ram a changkan dawn chuan mimal, chhungkua leh khawtlang a fai a ngai tih a sawi a; Mission Veng chu Aizawla veng hlun leh changkang hmasa, Zosap missionary-te \huthman a nih avangin, veng fai a nih a ngaih thu sawiin, Mizorama khua leh veng hrang hrangte entawntlak khawpa fai nih tum turin veng mipuite a chah. Col Zuala chuan,"Sipai kan tan laiin fai kan ngai pawimawh a, a chhan chu fai hian discipline a ken tel vang a ni a, fai hian mahni inthununna a tilang bawk a. Pawn lam leh chhung lamah Mizo te in vawn fai ka zir zel a tul a ni," a ti bawk. Faina Beihpui hawn a nih hnuah, Mission Veng YMA North Branch leh South Branch-a section pakuate chu inthenin, an section theuhah khawlai leh kàwmkárte an tifai a; mi thahnem tak an thawk chhuak a ni. Mission Veng Faina Beihpui thlak hi October 8-29, 2016 chhunga neih tur a ni a; beihpui thlak chhungin a khát tâwkin beihpui thlak hnatlang an nei thin ang. Mission Veng chhunga zirna in hrang hrang - Boys Primary School, Boys Middle School, PC Girls' School, Govt. Aizawl College, Mamawii Higher Secondary School, MHIP School, English Congregation School, Gospel Centenary School, Boston Higher Secondary School, Goodwill Foundation School zirlaite leh zirtirtute pawh a inchhawkin an hnatlang thin dawn a ni. Hei bakah hian Mission Venga sawrkar office te, Synod office, bank-te leh damdawiin awm zawng zawngte pawh an building leh a chhehvelte tifaia hnatlang turin an ngen bawk.