Aizawl; Kum 2014 a dawt a hek an nih vanga thubuai nei, Madhya Pradesh-a Thlarau Bo Zawngtute (TBZ) missionary te chu thiamchantir niin, 21.2.2022, Thawhtanni khan Court case an neih tihtawp a ni.

TBZ hruaitute hnen atanga ZALEN thudawn danin, Madhya Pradesh field a rawng an bawlna ah 12.9.2014, tlai dar 6:15 khan buaina neiin, Barwaha a awm Sunil Prajapat chuan an inchhunga milem pathiante tichhia a, paih vek a, a aiah Isua thlalak tar tura tih a nih thu leh Rs. 2,00,000 pe a, Kristiana in let tura tihluihna hmanga thlemah puhin Court ah a hek a.

He thil hi field committee in Chanchin tha beihpui thlak programme Barwaha bial a an kalpui atanga intan niin, thil fello a thleng dawn tih hriain missionary thenkhatte chu an inthiar chhuak hman a, inthiar chhuak ve hmanlo missionary 10 (Mizo 7 leh hnamdang 3) te chu man niin, ni 4 leh zan 4 jail ah khung an ni.

Jail atangin Missionary te hi bail a chhuah niin, Rev. Dr. K.G. Easo, Mission Director (The Soul Winner India Mission, Barwaha) chuan Indore atanga Ukil an rawih hruai nan kum hnih chhung zet a thlawnin a motor a thawh a, missionarty te jail an tan lai hian jail a tang mek Mizo missionary pahnih te nupui fanau te chu Barwaha khua atanga hnawhchhuah hial an tawk bawk.

Thubuai tihfel a nih hma thlengin Ukil 4 an ruai hman a, Ukil an rawih hnuhnun ber Dr. Umesh Mansore chu December 20, 2021 atanga ruai tanin, ani hian February ni 4 leh ni 16, 2022 ah Court ah kalpuiin, February 21, 2022, chhun dar 12:30 khan Court case a tihfel sak a ni.