Aizawl: Mitdelna laka inven leh inenkawl hma inzirtirna ‘Walk in the dark’ rally chu nimin zing dar 7 khan Vanapa Hall atanga Millennium Centre thlengin neih a ni. Rally hi Vanapa Hall kawtah Dr. Lalnunthara, Commissioner for Persons with Disability, Govt. of Mizoram chuan a vailiam a, rally-ah hian Mary Mount School (Tlangnuam), Govt. Comprehensive Model School (Model Veng), St. Mary’s School (Electric Veng), St. Lawrence School (Ramthar Veng), Oikos Higher Secondary School (Khatla), Govt. Boy’s Middle School (Sikulpuikawn), Special Blind School (Durtlang) atangin school naupang thahnem tak an tel bakah Mizoram Blind Society an tel bawk a ni. Rally kharna Millenium Centre kawta neihah thu sawiin Dr. Lalnunthara, Commissioner for Persons with Disability chuan Mizoramah naupang mit lama harsatna nei 18% an awm tih a sawi. Rally hmanpuitu official-te hian June thla tira Govt. Comprehensive Model School, Model Veng, Aizawl-a Vision Screening Program neiha tarmit chawh naupang 18-te hnenah tarmit an hlan a ni. Nimin rally hi India ram chhunga hmun hrang hranga India Vision Institute-in mit lama harsatna nei leh a thlawna inentirna, a bikin mi harsa zawkte tana buatsaih awareness campaign a kal lai mek chhunzawmna a ni a. He rally-ah hian Serchhip leh Lunglei district chhunga school naupang 10000 tana a thlawna mit entirna project hawn nghal a ni.