ZALEN Oct. 17, 2024; Mapuia YT Official (Youtube channel) atanga mite hriat lar leh ngainat, Bawkbawn Mantupa (BBMTP) BB-a (19) chu vawiin chawhnu dar 1 khan thlahliam a ni, ui tu leh suntu Mizoram hmun hrang hrangah a ngah hle.

Tlabung atanga ZALEN thudawn danin, BB-a hi nizan khan an chenna in ah tlaivarpui niin, vawiin chawhnu dar 1 khan Buddhist sakhua invui dan angin, a ruang halral a ni. Amah vuina ah hian an thenrual thate leh Youtube a amah kaihruaitu Mapuia (Mapuia YT official) te an tel.

Tarlan tawh angin, Mizo mipui ti hlim a, ngainat hlawh em em BB-a hi nimin (15.10.24) chhun dar 12 vel khan Civil Hospital Tlabung ah a boral. 

Youtube lam a BB-a kaihruaitu leh kawng hrang hranga tuamhlawmtu Mapuia (Mapuia YT official) chuan BB-a a ui thu leh a sun thu heti hian a sawi.

"I damlai kha chuan ka zirtir i ni thin a, tunah chuan min zirtir tawh dawn a ni. Ka lo zirfuh theih nan i kal ta si a, ka zirfuh theih nan i kal mai a ngai a ni. I kal mai loh chuan ka kal dik thei dawn lo a ni. Ka na a ni...mihring mihrinna atang chuan ka na a ni e...,"