Aizawl; Tunhnaia mi thenkhat ten an thihpui Pa (mushroom) chu Mizoram University mithiam ten an enfiah mek a, hemi hnu hian endik turin Chennai ah thawn leh a ni ang. Health Department hnuaia Integrated Disease Surveilance Programme a thawk Dr.Pachuau Lalmalsawma chuan June 28,2014 (Inrinni) a Lawngtlai a chhungkaw pakhat te pa ei leh June 19 a Sentetfiang a pa an ei te chu a sample lain MZU a Biotechnology Department mithiam ten an zirchiang mek a, scientific identification an neih hnuah DNA sequencing ti turin Chennai ah an thawn leh dawn tih a sawi. Dr.Pachuau Lalmalsawma chuan pa inang a tam tih sawiin, " Pa zingah tur(poison) pai a awm theih avangin kan hriatchian chauh ei a him a,amaherawhchu hlauh lutuk erawhchu a thalo a ni," a ti. Tunhnaia pa ei thenkhat an thih chhan chu chiang taka hriat la nilo mahse lei sawngbawlna atana hman 'pesticide' vang a ni thei tih a sawi a, pa chi hrang hrang chhumpawlh pawh inhal a awm theih avangin ei loh a him ber tih a sawi bawk. Pa eisual chu thawh dan chi thum- Pumpui leh ril a thawka lang nghal mai chi te, Hriatna thazama thawk chi leh zawi muanga taksa tichhe chi a awm tih Dr. Pachuau Sawma chuan a sawi bawk a. Pa diklo kan eipalh anih pawhin inkawm luah (luak) a, meihawl rawtdip tui in hnuah rang taka damdawiin pan a him ber tih a sawi bawk. Pa eisual vangin kumin ah mi 5 an thi tawh. May 23 khan Ngaizawl mi 3 in an eisual a, June 19 khan Sentetfiang ah pa chhumpawlh vangin 2 an thi a, June 28 ah Lawngtlai an ei sual leh a an thi lo hlauh.