Aizawl October 14, 2023 : KVK Champhai District, Khawzawl chuan Zirtawpni khan Rabung khuaa Tomato chingtute kawmin mithiam ten tomato chin leh enkawl chungchangah zirtirna an pe a, an harsatna tawh te a hmunah an enpui bawk.

KVK-a thawktute hian Phunchawng zau, Kangfim zau leh Khumzawl zau-a Tomato chingtute harsatna tawh Tomato bacterial wilt,virus chungchanga harsatna te leh a rah keh chungchanga harsatna an tawh hrang hrangte a hmuna kalin an enpui bawk. Rabung khua-ah hian chhungkua 32 in eizawn nan Tomato hi an ching mek a, nikum 2022 chhung khan 900 qtls an thar a ni.

KVK Champhai District, Khawzawl te hian Tomato chin dan chungchangah hian zirtirna an lo pe tawh thin a, kum 2015 atang khan Champhai District huam chhunga Fur laia Tomato chin theih ni ngailo kha Tomato variety Arka Rakshak la lutin Tuipui khua-ah Tomato hi an chin tir a, Khawzawl district huam chhunga khaw hrang hrang Tualte, Rabung, Chawngtlai, Khawhai leh Neihdawn-ah te Arka Samrat leh Arka Abhed te chingin hun engemaw chen atang khan chhungkaw tam takin eizawn nan an hmang a ni.