Aizawl: Vanglaini chanchinbu chuan kum thum dana award an hlan thin, Mizo Award 2017 chu Prof. Joy Lalkraws-pari Pachuau, Ramhlun North, tuna Jawaharlal Nehru University (JNU), Delhi-a thawk mek hnenah an hlan. Mizo Award vawi 3-na hlanna inkhawm hi nimin chawhnu khan Beraw tlanga Convention Centre-ah neih ni a. Vanglaini Joint Editor Lalnghinglova Hmar-in kaihruaiin, ZONET Cable TV Director  RK Lianzuala’n award dawngtu kawmna hun a hmang a. Mizo Award 2014 dawngtu Sangthankima, TNT hotupain Prof. Joy Lalkrawspari Pachuau, Ramhlun North hnenah Mizo Award 2017 a hlan a ni. Rev. LB Pachuau fanu, Prof. Joy-i chuan thu sawiin, “Hetiang lawmman hlu tak min pe hi ka lawm a, hetiang ka nih theih chhan hi ka chhungte vang a ni. Ka duh zawng, tui zawng, ka chak zawng tih min phalsak a, an chungah ka lawm a. Pathian min enkawlnaah ka lawm tak zet, ka engkima engkim a ni,” a ti. Prof. Joy-i chuan “Vanglaini-in academic in chawi sang a, chutianga mite chawimawina min pe hi ka lawm a, kei hian academic lam mite aiawha ka inngai a, academic lam mite aiawhin ka lawm a ni,” a ti bawk. Vanglaini chanchinbu hian Mizo Award hi kum 2011-ah an buatsaih tan a, kum 3 dana pek thin niin, kumin hi a vawi 3-na a ni. Mizo Award dawng tawhte chu kum 2011-ah Brig. T. Sailo, kum 2014-ah Sangthankima, TNT leh kum 2017-ah Prof. Joy Lalkrawspari Pachuau te an ni. Tun tuma Mizo Award hian trophy leh Rs. 2,00,000 a keng a ni.