ZALEN July 24, 2026: Special Court, Prevention of Corruption Act Judge, F. Rohlupuia chuan Mizo Carbon Product subsidy eiruk thubuai ah accused pali thiamloh a chantir te chu vawiin khan hremna a puang a, kum 2 tang tur leh Cheng 1,50,000 chawi tura tih an ni.

Heng mi pali, Ravi Gulgulia, Vimal Kishore, Pramod Bharech leh Sandeep Agarwal te chu hremna inang vek a pe a, Section 120B r/w 420 IPC ah kum hnih tang tur leh cheng nuai khat chawi turin a ti a, Fine an pek theih loh chuan thla 4 an tan belh ang.

Section 120B r/w 471 IPC ah hrem a ni bawk a, thla 6 tan leh fine ₹50,000/- pek a ni a, fine an pek theih loh chuan thla 2 an tan belh ang. An tan hun chhung tur hi kum hnih leh a chanve tur a ni a, mahse, an thubuai hi kaihkawp a nih vangin kum 2 chhung tang turin an chungthu hi rel a ni.

He thubuai hi kum 2017 atanga ngaihtuah tawh a ni a. Industrial Growth Centre, Luangmual-a Mizo Carbon Product Ltd te chuan sawrkar laipuiin hmarchhak biala thil siamchhuahna tih hmasawnna atana a ruahman, Central Transport Subsidy(CTS) leh Central Capital Investment Subsidy (CCIS) a pek te chu dik lo takin an dil nia sawi a ni a. 

CTS leh CCIS hnuaiah hian Rs.3.41 crore vel an la tawh nia sawi a ni a. CTS leh CCIS hnuaia subsidy dawng tur hian coke siam chhuahna tura hmanrua te, phurh kualna leh lehkha dangte chu lehkha lem hmanga lak vek niin sawi a ni.