ZALEN July 23, 2026: Vawiin khan Special Court, Prevention of Corruption Act Judge, F. Rohlupuia chuan Mizo Carbon Product subsidy eiruk thubuai ah accused pali thiamloh a chantira, heng mi pali te hi Section 120b, 420 leh 471 IPC hnuaiah thiam loh a chantir a; midang 13 te erawh thiam a chantir thung.

Special Judge F. Rohlupuia chuan Ravi Gulgulia, Vimal Kishore, Pramod Bharech leh Sandeep Agarwal te chu thiam loh chantirin, prosecution-te chuan an chunga puhna te chu rinhlelhna tur engmah awm lo khawpin an finfiah thu a sawi a. Heng thiam loh changte hi naktuk 24.07.2026 hian court chuan an hremna pek dan tur a puang ang.

Court chuan accused dang - Dr. Margareth M Varte, Biswajit Chanda, Kajal Kanti Dey, J. Lungawia, Suchil Kumar Goyal, Atul Goyal, Praveen Choudhury, Santosh Kumar Jain, Lalrohlui, Rozama, LV Vanlalrema, John Saikhuma leh Navin Jain te an puhna chu rinhlelhna tur awm lo khawpa prosecution ten finfiahna an pek zawh loh avangin thiam a chantir thung a ni.

He thubuai hi kum 2017 atanga ngaihtuah tawh a ni a. Industrial Growth Centre, Luangmual-a Mizo Carbon Product Ltd te chuan sawrkar laipuiin hmarchhak biala thil siamchhuahna tih hmasawnna atana a ruahman, Central Transport Subsidy(CTS) leh Central Capital Investment Subsidy (CCIS) a pek te chu dik lo takin an dil nia sawi a ni a. CTS leh CCIS hnuaiah hian Rs.3.41 crore vel an la tawh nia sawi a ni a. CTS leh CCIS hnuaia subsidy dawng tur hian coke siam chhuahna tura hmanrua te, phurh kualna leh lehkha dangte chu lehkha lem hmanga lak vek niin sawi a ni.