• Lalchhandama Colney
• Tute Nge An Nih? Kan thlahtute lampangah pawh hian sumdawnna lam sawi tur kan nei teh chiam lo. Chhurbura thawnthua Paihte sumdawng tih vel bak kha chu kan nei lo hle. U.T. kan nih hnu vel atangin sumdawnna lam thenkhat chuan an ti tan a. Hlawhtling tak takte kan awm ve a; mahse, kan uar teh chiam lo.
  Vawiina dawrkai kan hmuh tam zawkte hi chu hman ni lawka mi, kum 5 em pawh la tling lote kan ni hawlh hlawm.
  Vai kan tihhote erawh an upa thei hle, an nu leh pa, pi leh pute, kum 30/40 chuang lai lo tih tawh thinte an ni hlawm thin. Hei vang hian thil chinchang an hre hle a, vaichhia/naupang kan tih mai maite pawh hian rilru an nei thei riau thin.
  Keini erawh chuan experience kan la neih loh vang nge ni, sumdawn dante hi kan la thiam tawk lo, kan taima lo, a tawpah kan dawng leh der mai thin.
  Hetih lai hian vai thirchhe zawng mai mai emaw kan tih te khan kum 4/5-te an vei chuan bike/scooty an khalh tur tur tawh mai thin. An tei rei peih a, keini erawh kan hmanhmawh, kan nghak hlei thei lo thin.

Hmalakna: Kum 1980 chho vel lai atang khan Mizoten hnam feeling nei tanin hnam dang dawrkaite kan ngai mawh tan a. An dawrte kan suasam a, kan um darh ta vek a. Chumi hnuah dawr neitute lamin Mizo chauh an han luahtir ve tan bawk a. Tlawmngai pawl hrang hrangten hma la zelin hnam dangte chu nekchepin an awm ta hle a. Sawrkar lam atang pawhin dan a awm bawk a. Tun a la awmhote hi chu Mizo hming hawh an ni hlawm tawh ang. Zokhaw lamah pawh hma lak zel a ni a, sawt pawh a sawt viau mai, a lawmawm hle mai.
Tunah hian Mizo sumdawng pawlte kan awm ve ta nual a, hengte hian eng emaw hlekah chuan hma la thei zel tura ngaih an ni. Hetih lai hian kan sumdawng pawlte an that loh a, duh duh a thil mante an tihdanglam thin chuan mipuite an lawm lo ang a, thlawp an hlawh lo mai ang. Hetiang thil hi VISHAL leh Bazar India chungchangah khan kan hmu theuhin ka ring.

Ka Thlir Dan: Hman deuh atang khan tiffin tur biscuit hi ka lei lawk thin a. Eng emaw deuh lai atang khan thalo tak, vin deuh takte hian min ti ta fo mai a. A chhan tur ni awm ka ngaihtuah vang vang pawh hian ka hre mai thei lo. Mite chuan regular customer neihte an duh hle thin a, anni (Mizo) erawh chuan duh mang lo ni awm takin an khawsa ta tlat mai. A hnu atang chuan ka bazar dawn apiangin ka tawngtainaahte ka telh ta thin a, zia lo hle mai. Ka rilru tete chuan, “Vaiho kha an ngaihawm mang e aw,” te ka ti a. Tichuan, loh theih lohin vai dawr awm chhunte chu ka pan ve ta thin a.
“Vai chu dawr lo hram zel teh ang,” han tih pawhin a tih hleih theih loh, mi duh lo chung chung dawr tum kan ang ta riau zel mai.
Hetiang hi kan ni ve deuh a, kei lo pawhin in tawng ve foin ka ring; chuvang chuan vai dawr 2/1-te hi chu awm ve zel se, in zir nan, inenlet nante a thain ka hria. Chu bakah keini pawhin an ramah sumdawnte eng tik hunah emaw chuan kan la duh ve mai thei asin.
Hma lam Hun: Khasi, Assamese-te kan hria ang a, tunah chuan an mahni hmuh tur an awm mang tawh lo. Sumdawng lian, dawrkai zawng zawng deuh thawte chu hnam dang an ni deuh vek tawh a ni. An tan tihngaihna a awm tawh lo, a chang changa nawrh huaihawt zauh zauh tih bak chu, tih theih an nei tawh lo.
Keini erawh kan harh hma, kan vannei hle mai, thil a kal thui hmain kan nawr chhuak leh hman deuh vek a. Amaherawhchu, kan inhre tlang ang a, dawr kan hrehawm thin hle. Dawr neituten kan dawr nghakte kan hrilh ve fo a pawimawh hle.
Hetih lai hian a dawrtute lam pang pawh hi nulate an nih phei chuan rim deuh nghal maite kan ching ve bawk a.
Awle, kan hriat theuh angin hnam dang dawr kai kan nei ta mang lo, hei vang hian kan hma lam hun a êng hlein ka hria. Tun ang rengah chuan chimral mai pawh a hlauhthawnawm loh rih hle mai; amaherawhchu, kan fimkhur hle reng a ngai tho ang.
Sumdawn thiam tak chu kan la ni lo tih chu kan inhre tlang ang a; mahse, kan indawr luih hram hram hi a tul hle mai, nakinah experience kan neih ve hunah kan la ziaawm ve mai ring ila. Mût fuh loh tumte hi a awm ve a; mahse, a nazawng hi chuan mût fuh loh tum lo hram ila. Custumer kan lo welcome thiam viau thin chuan kar lovah min min lo hria ang a, min rawn pan ruih ruih mai dawn a ni.