India rama Mixed Martial Arts federation lian ber, MMA India-in inelna a huaihawt thin zinga lian berah Mizo fighter-ten hlawhtlinna duhawm tak changin medal pahnih an hawn.

Kumin kumtira national championship-ah sorkar puihnaa kala result tha tak an neih hnuah Mizoram State Mixed Martial Arts Association (MISMA) fighter pali leh coach pakhat chu Mizoram aiawha August 24-29, 2023 chhunga Madhya Pradesh khawpui, Bhopal-a 3rd Indian Open MMA Championship-ah feh chhuakin gold leh bronze medal pakhat ve ve an la leh.

Mizoram tana medal latute hi Senior Flyweight-a khel ve ve -  Nazareth Lalthazuala, Zemabawk leh Lalhmangaihzuala, Republic veng an ni.

Senior Flyweight-ah hian champion lai, Nazareth-a hi a che tha hle a, round of 16-ah Donyi Polo, Arunachal Pradesh chu TKO-a hnehin quarter final-ah Bhavesh Dabgoria, Madhya Pradesh chu unanimous decision-in a hneh leh a; semi final-ah a team-mate Hmangaiha chu unanimous decision bawka hneh lehin final-ah Assam fighter tha Abhijeet Tripura chu unanimous decision-a hnehin a champion a ni. 

Hmangaiha hian round of 16-ah paltlangin quarter final-ah Sandeep Bhagel, Rajasthan chu triangle choke submission hmangin 1st round-ah a hneh a. Semi-final-ah team-mate Nazareth a hneh zo ta lo va, bronze medal a la ve thung.

Mizoram aiawha chhuak dang, Israel Lalrinawma, Hunthar, Junior Flyweight-a khel chuan quarter final a paltlang zo lo va. HMS Dawngzuala, Dawrpui, Junior Welterweight-a khel pawh quarter final-ah a chak zo lo bawk.

Technical Chairman Samuel Lalrozama chuan MISMA-in an fighter-te chu tawnhriat a tam thei ang ber neihtir zel an tum thu a sawi a, “September, 2023-a Nagaland Fight Night awm turah pawh tuna kan fighter zinte hi hlawh neia company sponsor vekin an fight leh thei nghal dawn,” a ti.

Tun tuma MISMA-in a tirh chhuah zinga mi, Coach Jonathan Lalduatliana, Falkland leh Nazareth te hi MISMA Senior Vice President Jeremy L. Pautu hmalaknain pawlin a sponsor a, mi dang pathum hi mahnia sponsor zawnga kal an ni.

India-a MMA federation lian ber, MMA India hian kum khatah national championship bakah open pali vel a huaihawt thin a, heng zinga lian ber chu tuna Mizo fighter-te inlanna hi a ni. 

World Championship-ah Mizo fighter
November thlaa Serbia-a khawvel huap inelna neih turah MISMA fighter pahnih tel turin thlan an ni bawk.

National championship-a weight pathuma champion-a record siam mek, Zarmawia, Chite veng leh Flyweight national champion vawi hnih ni ta, Nazareth-a te chu Serbia-a Amateur MMA World Championship khelh tur hian thlan an ni.

International medalist nih chuan professional luh chhohna kawng a inhawng zau sawt dawn a, MISMA President T. Lalrinpuia chuan theihtawpa hma lakpui zel an tum thu a sawi.